Withukire bwa ngige gutema ntaame CS Munya akiuga tuuwati bwa kinthiguru


Minista wa urimi Peter Munya naugiite kuithuka kwa ngige aaga Kenya gutiumba gutumiirua ta ugwati bwa kinthiguru nontu nikurwaanwa nacio.

Akiaria kagiita kara arariungiite nteere cia Laisamis county ya Marsabit, Munya augiite thirikari nikurutha bwa kugana kurwaana na ngige inu akiuga tayari iciambiritie kuthira buru nteere imwe.

Arutiite miario inu wa rira atongoria kuubwa bwa ruguru rwa nthiguru wigiitue bakienda withukiri bubu butumiirue ta ugwati bwa kinthiguru.

Nkuruki Munya naugiite ibakuwatanira na ndwong’i cingi mwanya ira naamwe na KWS, KFS, KDF na NYS kurwaana na ngige inu

Arutiite miario inu wa rira kari nteere cia Mwimbi, Maara county ya Tharaka Nithi bari na uguaya bwa kugea hasara inene nyuma ya murumbi wa ngige gukinya nteere inu.

Bakiaria na Muuga FM, ibareganiite na muguramo wa minista wa urimi Peter Munya wa kuuga gutiri gitumi gia kubuiriira ngige inu bakiromba thirikari kuthukia itagaaria ria mpui.

Kagiitani gaku, ibauriitue batikaarie ngige inu nontu kwaumbikana ukeegua iraari imbuiriire guntu kura ciumiite.