Thirikari kuurio irugamie mihango yoothe guku bururi-ini niguo ihote kuhurana na corona


Kiama kia arutani bururi-ini  KNUT nikiuriitie thirikari icuuranie kurugamia mihango yoothe guku bururi-ini na ihamurithie andu maikare micii-ini yao niguo kuhonokia bururi uyu kuumana na kinguki gia coronavirus.

Mwandiki munene wa kiama kiu Wilson Sossion augiite kuona akenya aingi nimonaniitie kwaga guthingatithia na kinyi mitaratara iria igathikiitwo ni thirikari,kurugamia mihango yoothe noyo njira iria njega ya kungethanira na kinguuki kiu.

Onake mutongoria wa aria  aingi mbunge-ini ya county ya Kirinyaga James Kamau Murango,ni aiiitie ritana ota riu, akiuga akenya nimakoretwo makioya kinguuki kiu na uhuthu,,,, muno  makiria mathoko-ini, undu uria augiite noicungiriire namba ya andu aria maragumirwo ni murimu ucio kwambatira na gikiro kinene.