Tesetai serkalisiek chebo counties kokimiti chobchinetabgei nebo borietab miondo nebo Corona


Eng kasarta nekokon kurset serkali koitchi serkalisiek chebo county koker kole tinye kitandok 300 chekinyoe bik chetinye miondo nebo Corona ko kokotoi counties chechang kochobchigei kanyoisonotok.

Kamwa minister nebo tililindo eng Nandi Dr.Ruth Koech kole kokomuch county inotok kotaban kitandok 15 chekiboisie eng kanyoisetab bik chemite olengoi sobonwek chebo ICU ak kitandok chun alak 812.

Ye kangongololi ak ketesioni komwa Koech kole agot kounotok kotesetai kochere bikab emet kosuldae ngatutik chekikon serkali asikobit keter kayaptaetabgei nebo mionotok kale kit nebo kamanut eng nguni ko kekirinda miondo nebo Corona.

Kangong Koech kole bik chemite olengoi eng miondoab Covid-19 ko icheg chetinye mionwogik alak cheu Cancer ,sugaruk ak eng notok komagat koek cheribegei missing.

Eng county nebo Nakuru kokamwa minister nebo tililindo Dr.Kariuki Gichuki kole tesetai county inotok konoisechin bikab emet agobo kamanutiet nebo koek cheribegei agobo mionotok bo Corona.

Kamwa Dr.Gichuki kole eng nguni kotinye county inotok bik 63 chetinye miondo nebo Corona chekale tesetai konyoru kanyoise.

Kangong Dr.Gachuki kole kokotaban county nebo Nakuru kitandok 1000 chekinyoe bik chetinye Corona ak kitandok 20 chebo ICU.