Sammy Leshore kuuyuria kanya ka Isaac Mwaura ta senator wa kworotwa


Sammy Leshore nataaritwe i kiama kia Jubilee ta senator wa kworotwa kuuyuria kanya ka Isaac Mwaura.

Kiri ntumiiri gazettini ya kithirikari, mukariri giti wa nkiama ya ithurano na mianka IEBC Wafula Chebukati augiite itagaria riru riumaniitie na itua ria nkiama ya kumurika ntiga biamani bia gisiasa.

Ino i nyuma ya spika wa senate Ken Lusaka gutumiiria kurutwa gitini kwa Mwaura ta senator wa kworotwa ntugu ya igoro na kuregana na ntheto ati ikuraari na watho bwa koti kurigiiria untu bubu.

Niitagaria rira rithukiitue amwe na kwigua koti ya Nairobi irungikiite kurutwa wake gitini ta senator mwanka rira igamba rira riri kotini ruithikiirue na kugiitwa.

Mugambithania wa koti ya Milimani Joseph Sergon ugoro bwa igoro nararutire watho bwa kurigiiria kuuyurua kwa wendekithia bwa nkiama ya kumurika nkuyanio cia biama bia gisiasa bwa Nchumaa ya kiumia kithiru.

Nkuruki, mugambithania Sergon narungikiite kuuyurua kwa notice ya igoro kiri gazette gukurukiira spika wa senate Ken Lusaka gutumiiria giti giku ta kiitheri.

Sergon naweteete igamba riru ta rea mpwii na kuuga rikathikiirua tariki 24 mweri uyu.

Ntumiiri ya spika Lusaka ya kurutwa gitini kwa Mwaura kiri mbunge ya senate igoro nirakuuyiria rwaria rurito gati ka masenator, bara ba murengo wa Tangatanga bakimeneeria untu bubu.