Rugendo rwa BBI


Mbunge ya senate iwatanirite na ya nthiguru na ira cia kaunty nkeruki ya 40 gukurukia rwaria rwa kuruthira katiba ugaruruku rwa BBI, riboti inu indi nierekerete gaaruni ya rais ara mutongoria wa nthiguru Uhuru Kenyatta akaruta mwerekera kiri nkiama ya ithurano na mianka IEBC kuthuranira kura ya kugarura katiba wa ntugu 90.

I rugendo rura rwambirie tariki 9/3/2018 rira rais Uhuru Kenyatta na mutongoria wa ODM Raila Odinga batumirie kuthiria mpathu cia gisiasa na kuleta nthiguru amwe, bakeonania untu bubu gukurukiira nkethi/ Handshake.

Tariki 31/5/2018, bairi baba ibaruthire nkiama ya antu 14 na mworoto wa kuithirania maoni kuuma kiri mwingi kumenya kaumo ga nthiga cia kira nyuma ya ithurano na kuthuranira riboti ya mendekithia ma kuthiria ntiga inu.

Nkiama inu itongoreetue nuura aari senator wa Garissa mututigi Yusuf Haji nethuranire riboti ya mbere buru ya BBI ira yaarekerue tariki 27/11/2019 ira mendekithia meeyo maathire mbere kurutirwa maoni i mwingi na ikundi mwanya mwanya kwona nigutumika kuruthira ugaruruku katiba ya mwanka wa 2010.

Riboti ya ciiri ya BBI neathuranirwe nyuma ya maoni iguru ria mendekithia ma riboti ya mbere na kurekeerua kiri mwingi nyomba ya micemanio ya Bomas tariki 26/10/2020.

Tariki 25/11/2020, IEBC neambirie mutaratara wa kuithirania saini cia bara bakuwata mbaru riboti inu na kwa mweri umwe namba ira yeendekenaa kiwatho neari kugana na yakurukiiria, riboti inu yaatumwa kiri mbunge cia kaunty.

Nyuma ya kuwatwa mbaru na gukurukua i kaunty ira mbingi gukinya Nchumanne ya tariki 23/2/2021, riboti inu neatumirwe kiri mbunge ya nthiguru na ira ya senate na yaakurukua tariki 6 na 11 cia mweri uyu kithingatano.

Kiri mbunge cionthe kwambiria cia kaunty mwanka ya senate, riboti inu ikurukiitue itakuruthirwa ugaruruku nwa buriku.