No gutiratuwa kethira aritwa bonthe bagetikirua gucooka cukuru mweri jwa 9 kana ari, CS Magoha kuuga


Minista wa kithomo Prof. George Magoha nakuuga no gutiratuwa kethira aritwa bonthe bagetikirua gucooka cukuru mweri jwa 9 kana ari.

Kiri gikaro na arungamiri anene ba ndwnagi cia kithomo gia kiubundi, Magoha nakuuga itua riu rikaritwa nyuma ya kanju ya aminista kuthuranira gikaro ruuju.

Iguru ria nteto ya kuthingatira gataria ka mita imwe gatagati ka aritwa, Magoha nakuuga kwomba mathomo jakagitwa na mikondo gutigira bubu nibukuthingatirwa.

Oo nagwatirite ati kinya kethira cukuru kwomba ikarugurwa mweri jwa 9, bubu bukaringana na kunyiia kwa virus ya corona aja nthigurune.

O kagitene kau minista Magoha nakuria ituo bia mathomo ja kiubundi, TVET, bigite mathomo na mikondo riria bikarugurwa.

Magoha nongerete kuuga nkuruki na aritwa gukara gataria ka mita imwe na nusu kuuma kiri uria ungi, ituo biu nibibatie kubangania mitaratara yabio kairi kwona aritwa bonthe nibakuthoma kwa mikondo iria igeekwa.

Na mugaru na cukuru cia pry na secondary iria thirikari ikarungamira ngarama ya mask iria ikaritwa kiri aritwa, ituo bia kiubundi bikendekana kurungamira mask iu biongwa.

O kagitene kau, minista uju naugite ati ariti ngugi bairi ba Kabarak Guest House nibagwatikene barina virus ya corona, na ati antu 80 batangamanite nabo nibeeki karandini gituone kimwe kaunti ya Nakuru.