Ngukumo kiri wandikani bwa jeshi


Aciari aaga nthiguru ibataaritwe kuimenyeera kuiywa naantu bara bakubeetia mbeca kubaandikira aana kiri rwong’i rwa ukaria.

Akiaria kienini gia cukuru ya pry ya Mikinduri nteere cia Tigania, afisa ura urugamiirite kithurano kia jeshi P Muteti augiite mutaratara uyu uriruthwa na njira ya weru na gutiri muntu ubatiiri kweyana mbeca.

Bubu buthiite mbere wa rira afisa wa nkathi cia iguru rwong’ini rwa jeshi akinyithiitue kotini ya kijeshi kambi ya 78 Isiolo akiirikana kuthukia Kshs 480,000 kuuma kiri raia bairi na wirane bwa kubandikithia kiri kithurano kia disemba mwanka wa 2019.

Andrew Muoki Mutua wa ukuru bwa mianka 40 athitangitwe na kuthukia Kshs 300,000 kuuma kiri Edwin Kinyua wa mianka 21 na ithe Muriithi Kinyua kaingo kuthungiria Edwin kwa jeshi, mbeca ira ciekiirwe akauntini yake.

Nkuruki, ariirikari kuiyira Nelson Kabwere Mandela Kshs 180,000 na wirane wa ta bubu ara ntheto inu cionthe ciaruthukire ubisini bwake nteere cia Hurlingham, Nairobi.

Igamba riru rikaathi mbere kuthikiirua imunthi i mugambithania Samuel Mungai ara munkuji wa bathatu na akuirigira gukinya kuruta ukuuyi.