Mwandiki wa KNUT Sossion kuria igerio bia KCSE na KCPE gutirua mwanka mwaka twitite


Mwandiki wa kiama kia arimu KNUT Wilson Sossion nandi nakwenda igerio bia kinthiguru bia form 4 KCSE na kiraci kia 8 KCPE bitirue mwanka mwaka twitite nyuma ya kwangaratana gwa kalenda ya cukuru kumana na mpanga ya corona.

Sossion kiri gikaro na aandiki ba nteto obicine cia kiama giteteri kioto kia umuntu, KHRC, mutaene jwa Lavington aja mucii munene jwa Nairobi nakwenda thirikari yaambe iraithe kuthiria corona mbere ya kuthuganiria igerio bia KCPE na KCSE.

Mwandiki uju wa arimu nakuuga uturo bwa arimu na aritwa ni bwa bata, indiria akiuga cukuru kurugurwa ni nteto ibatie kwarirua na ti gutuwa na njira yakidikteka.Sossion nakuuga baingi ba arimu aja nthigurune barina ukuru bwa miaka 50 gwitia na kwou nibaatiki ni hatari nene ya kugwatwa ni corona kethira cukuru ikarugurwa kagita karia murimo juu jwitite mbere kumata aja nthigurune.

Iguru ria kalenda ya kithomo, Sossion nakuuga cukuru ciarugurwa arimu bakambiria kuuma aria baatigirire mathomo niuntu ti muritwa wonthe ukuumba kuthoma gukurukira mitandao.

Miario ya Sossion nikiiri ni ngwataniro ya aritani ba mauniversity, UASU, ikiuga ati nkuruki na gwika mitaratara ya urui na corona, thirikari nibatie gukinyaniria mitaratara ya mathomo maturene kagita gaka.

Ni gwa kagita karia kanju ya kinthiguru ya makanisa igwatirite ati cukuru ibatie kurugurwa riria aki kurina mitaratara minna kuuma kiri ministry ya ugima bwa mwiri ati ururu bwa corona nibuthiri bururu na ti ugwati kairi kiri aana na mwingi.

Ndwangi iu ithatu niritite uuge bwacio kiri kamiti ya kinthiguru yegie kithomo kagita gaka ga corona.