Mutumia wa miaka 57 gukorwa auragitwe na mwiri wake kuvingirwa ngariri yake mwena wa Embu


Maovitha a polithi mwena wa Embu west nimambitie kuthuthuria kiumo kia gikuo kia mutumia wa miaka 57 uria urauragirwe na mwiri wake gutigwa ngariri yake iturari ria Maria Mairi varavarari ya kuma Embu kuthii Kibugu. Mwiri wa Beatrice Wanjiru Gatura uria ni ovitha wa migunda muciiri wa Embu ukorirwe ngariri yake iria iratigitwe gatagati ka varavara uthaikitwe njara na maguru na gukunikwa kanyua na gitambaa na kungerwa ngingo. Ocpd wa Embu West Charles Kinyua agikira kirore ndeto ino, augite mavurirwe thimu kiroko na kwirwa kwina ngari irugamitue gatagati ka varavara na vuva wa kuroria ndari makora mwiri wa mutumia. Kinyua augite mutumia uyu aronirwe ria muthia ovisiri thaa inyanya na aura nwati mwiri wake woneka umunthi kiroko. Munene uyu wa polithi augite kwina uvuthu mutumia uyu arauragirwe kundu kwingi na mwiri wake kuretwe vandu vau, guku akiuga nimambitie uthuthuria.