Musako barabarani na Alcohol-blow guchokeera kunyiithia mitino


Inspekta munene wa borisi Hillary Mutyambai naathite musako umurito aaga nthiguru kwambiria imunthi kiri madereba bara bakuuna mawatho ma barabara na guchokua kwa machini ya kuthima kiwango gia kathoroko mwiri ya ALCO-BLOW kumenya bara bakuthithia nkari batogoneete.

Ino i nyuma ya ribotii kwonania namba ya mitino aaga nthiguru yongerekeete wa ntugu cia rua ara wikendi nthiru yonka gati ga Nchumaa ya tariki ciiri na Nchumapili ya tariki inya antu 60 ibakuirite mitinoni ya barabara.

Ikaaririkanwa wikendi ino ireo wendia bwa nchobi bwachokeerete nyuma ya kuingwa kwa igiita, kwongereka kwa mitino gukiringithanua na untu bubu.

Kiri riboti inu ya rua, Mutyambai augiite gati ka mweri wa mbere na wa kenda mwanka uyu, antu 2685 ibakuite kuumania na mitino ya barabara.

Nkuruki, ikwonekaniite namba ira nene ya bara bakuirite mitinoni ya barabara i dereba ba bikibiki na abiria baago.

Mutyambai augiite musako uyu ukalenga bara bakuugia nkeruki ya bura kubatiiri, kuthithia nkari banyuite nchobi, kurega kwaiga line ya barabara bura kubatiiri na nkari ira itabatiiri kwigua iri barabarani.