Muritwa guikirwa mpiini ari na risasi cukuru, Embu


Borisi kaunty nini ya Embu North ibeekirite mpiini ariotwa bairi ba cukuru ya sec ya nthaka ya King David, Kamama; umwe ari na mburuburu na gungi akirikana kugeria kubiithia cukuru.

Agikuuyira ikarika riru, kamada wa borisi kaunty ya Embu Daniel Rukunga augiite muritwa umwe araari kumuntia maratati rungu rwa gitanda nyomba imwe ya kumama indi mukaria wa cukuru oona ntoogo mbere utumuka.

Nyuma ya aritwa kuruthirwa musako, ireo muritwa gungi arawatikanire na mburuburu ya 7.62mm mubukoni.

Bairi babu ibaingiritwe gituoni kia borisi kia Manyatta, Rukunga akiuga borisi ibatumiitwe cukuru inu kwaiga ukaria na kurigiiria winyangia nkuruki.

Aritwa ba cukuru inu baraari guchoka cukuru nyuma ya gutumwa mijii kiumia kithiru rira baukiirie ntiga kairi na kubiithia nyomba ciiri cia kumama.

Kamada uyu wa borisi naugiite ukaria bwa kugana ibwaigiitwe cukuru cionthe kaunty ya Embu na kuuria arimo kuringaga riboti yonthe ya ntiga gati ka aritwa kureo.

Nkuruki, nendekithitie eendia maguta ma petrol kuringa marufuku wendia bwa maguta mamu na muchuba.