Mung’ana jwa ajie ba covid-19 gwanka 31 aja Kenya


Antu bangi bathatu nibakujiri barina virus ya corona, na gwankia mungana jwa ajie ba virus iu 31.

Gukurukira ntumiri kiri nthiguru narua ugoro, minista munini wa ugima bwa mwiri Dr. Mercy Mwangangi nakuuga bau bathatu ni kuuma kiri ithimi bia antu 74 ba kuuma kaunti cia Nairobi, Kajiado, Mombasa, Kilifi na Kwale.

Bau bathatu ni antu aka ba ukuru bwa gatagati ka miaka 30-61, bairi kuuma kaunti ya Kilifi na umwe kuuma Nairobi, batangamanite na ajie ba au kabere.

Mwangangi nongerete kuuga kiri antu 1,029 baria bathingatitue bakirikana gutangamana na ajie bau, 123 kiribo nibamburi nyuma ya kurigirua gwa kagita ga ntuku 14 kumenya kethira barina virus iu.

Bau bangi 906 no bakuraithwa uria bari mwanka muthia jwa ntuku 14, na 18 nibamami cibitari ya Mbagathi gwetera ithimi..

Akari ba kaunti cia Mbwaa iria iringithitue ni virus iji nibakurua bathingatire mitaratara iria iiki ni thirikari, waraniria bugita na mbere iguru ria uria kaunti ya Kilifi igatungatwa umwe na ingi iria ikumira gukujira makarika jaja mono.O kagitene kau naugite kurina antu nkuruki ya ngiri ijiri bakinyite aja nthigurune kuuma jumatatu kiumia giki, na kwa nandi nibaathuri batigatangamane na mwingi na bakathimwa na kagita.

Oo kieni kia ndege gia kinthiguru JKIA nikiingi kuuma igoro utuku, na gutina ngendo cia kimanthiguru, no gukeja kwithirwa kurina nthiguru iringienda kurita raiaa bayo aja Kenya, bubu bukagitwa gukurukira ministry ya mantu ja kigeni, minista uju munini wa ugima bwa mwiri gwa kagita kangi akiuria akenya bete mbere kuthingatira mitaratara iria iiki kiri wiru bwa kurwaa na virus ya corona.