Mudavadi kuregana na uthondeki thirikari cia miena


Mutongeria wa kiama kia ANC Musalia Mudavadi nakuregana na wendekithia bwa kuthondekwa gwa kaanya ka minista munene aja nthigurune.

Akiaria narua rukiiri agukinya mbere ya gikundi kiria kithondeki kurita mwerekera iguru ria kuingua kwa riboti ya BBI, Mudavadi ithenyene riu nendekithitie rais ethirwe ari o mutongeria wa thirikari na aewe ngugi ya kuthuura minista munene kethira kaanya kau gakethirwa kario, na minista uu munene ethirwe arina anini bairi.

Mudavadi nakuuga gitumi kiawe gia kuregana na kuthondekwa gwa kaanya ka minista munene ni kumana na mathiina jaria jaakujiri thirikarine iita ria muthia nthiguru iji yaari na minista munene, akiuga nigwakujiri nkucanio indito cia gisiasa.

O kagitene kau, Mudavadi nareganite na ithugania ria kuthondekwa gwa nkathi ya ithatu ya thirikari yegie miena, akiuga kuringana na uria kuri nandi, thirikari nene na cia kaunti nikungana.

Nkuruki, Mudavadi nekite weru ati we na kiama kiawe bakagwata mbaru riboti ya BBI nyuma ya kumenya ati yorotete kuguna akenya bonthe na ti antu bakai kiumbe.

Nakuuga nikwithiritwe na uguaa na minung’uno ati BBI ni riboti iria bakai bakubanga gutumira kwiguna bo eene, indiria agiika weru ati uguaa buu no mwanka bwambe bweberue.