Mpathu kiamani kia ODM, Tana River


Mwandiki munene wa kiama kia ODM Edwin Sifuna natumiiritie kuingwa kwa ubisi ya kiama giku kaunty ya Tana River kuumania na nkuuyanio gati ka mirengo yiiri ya kiama giku na kila murengo uruguriite ubisi mwanya.

Ubisi inu ciiri, imwe nea murengo ura utongoreetue i gavana Dhadho Godhana na na yingi ya murengo ura utongoreetue imunthu wake wa gisiasa Adam Dhidha bonthe bakiuga ibo atongoria ba kiama kaunty inu.

Sifuna naugiite ithurano bia kiama giku bikaruthwa kwa mweri umwe tuthiite kaunty ya Tana River kuthiria nkuuyanio inu na ubisi ya kiama wigue ikirugurwa kairi.

Amwe noogu, miario na itua ria Sifuna ritithukiritue bweega naabunge bara bakugwata mbaru gavana Godhana na bara bareendaga murengo wa Adam Dhidha waaraganua na Godhana gutumiirua ta mukariri giti kuumania na ithurano bia mwanka wa 2013.

Bamwe ba abunge kuuma nteere iri ciiri bara baraari kiri mucemanio uyu wa ntugu ya igoro ibameneeretie ubisi nene ya kiama kia ODM bakiuga neo ikuleeta mpathu na ndwaa gati kaago.