Maundu ma ukui Makueni


Ngali 121 sya ukui wa ene nthi nisyo iminite kwianiisya mawalanio ala mekwendeka ni silikali matambite usyokea wia wa ukui wa ene nthi, naa nisyo syikwitikilwa kukuaa ene nthi kauntini ya Makueni.

Komishena wa kaunti isu ya Makueni Mohammed Maalim easya kana, kati wa ngali 2,500 ila ithukumilaa kauntini isu ya Makueni, ngali isu 121 nisyo maikiithisye kwithiwa sianiitye miao isu, vala waumya ukanio muvyu kana, mayitikila ngali ona imwe kukuaa ene nthi itaatiiyite miiao ila inenganitwe kumasiiya ene nthi kumana na uwau wa Corona.

Kuvikia yu tii, mbee wa matatu 300 sya ukui niminie kwikiwa mbini kauntini isu ya Makueni,nundu wa kwithiwa isyokie leluni iteanisye miao isu.