Masenator kung’ethera mangavana iguru ria ungumania matuura-ini


Mangavana ni mang’ethaniro ni masenator niundu wa kwaga kuigiririka hari uramati wa kigina kia muingi.

Senator wa Nyeri Eng Ephraime Maina augite ciiko cia ngukumio ni igumiire kaunti nyingi na kuhotomia utungata uria mehokeirwo gukinyaniria matuura-ini.

Gukiri uguo ni ahinyiririe honge cia kiwatho itikaunire maitho mangavana aria meguikuirwo ucuke kana ungumania.

Senator Maina araaragia hwai na ceceni ya Inooro TV, guku agititirithia bata wa utonga wa bururi kugayanio na njira ya waragania niguo gukuhiriria utungata kuri muingi.

Ndumiriri iyo ni inyititwo mbaru ni muhiuria wa mucarica wa aria aingi Irungu Kang’ata akiuga mbunge ya senate ni iguthii na mbere kumurika uria mangavana mararutithia wira kigina kia muingi.

Aheanite miario iyo ningi akienda ngavana wa Murang’a, Mwangi wa Iria aigiririke na njira ya gucokia ciuria mbere ya senate.