Maoni nkurani iguru ria kurugurwa wa cukuru, CS Magoha kumeneerua


Wa rira ntumiiri ya rira cukuru ikaarugurwa ikuirigiirwa kurutwa kiumia tuthiite, aciarti kaunty ya Isiolo ibaathukaniite iguru rea weegua cukuru irugurwe mwanka uyu kana ari.

Gikundi kimwe gia aciari kiriuga cukuru itibatiiri kurugurwa mwanka uyu nontu gutiri biici na corona itikuri kuthira buru wa rira kingi gikwenda irugurwa naampwi nontu ibanogeete gukara na aana mijii.

Wigue ikaarugurwa kana ari, bara baingi bariuga kia gitumi imendekithia monthe ma thirikari gukinyanirua kwona uturo bwa aana butiri ugwatini.

Kungi naku kiama gia kutheteera arimo kia KNUT rwong’i rwa Mumias ikireganiite na mibango yonthe ya cukuru kurugurwa mwanka uyu.

Mwandiki munene wa rwong’i ruru John Wesonga augiite cukuru mbingi itiibangite bwa kugana kurigiiria gutamba wa corona ara aweteete waagi bwa ruuji na bioro bia kugana ta kinyamaara kinene.

Wesonga nakwenda ministry ya kithomo iruta mwerekera wa biici ira aciari baari kurea na itaatumika wigue igitumika rira cukuru ikaarugurwa.

Nkuruki, nauriitie imwe cia mbeca ira wigiitue ikieyanwa ta uteethio kiri nthiguru kagiita gaka wigiitue ikirwaana na corona itumike kuriira aritwa biici kunyithiria aciari murigo uyu.

Kagiitani gaku, minista wa kithomo aga nthiguru Prof George Magoha nameneeretue anene ikwaiga aciari mwinduni kwa igiita riraaya iguru rua kurugurwa wa cukuru.

Akiaria nteere cia Mukothima Tharaka, mubunge wa kaunty ya Tharaka Nithi Beatrice Nkatha Nyaga augiite aciari ibabatiiri kwegwa riboti inganu kaingo kuithuranira guchokia aana cukuru.