Makarika ja corona gwanka 1,109 aja Kenya


Antu 80 beeru nibagwatikene barina virus ya corona kwa mathaa 24 mathiru, na gwakia 1, 109 mungana jwa ajie ba covid 19 aja nthigurune.

Minista wa ugima bwa mwiri Mutahi Kagwe kiri ntumiri ya o ntuku naugite bau 80 juria niju mungana munene buru jwa makarika ndene ya mathaa 24 bamenyekanite nyuma ya ithimi 3, 102, biria kinyabio nibio bia iguru buru binagitwa gwa kagita o kau, 77 bari akenya na 3 kiri bau beeru bari raiaa ba Somali.

Kiri makarika jau 80 meeru, kaunti ya Nairobi na Mombasa nitongeretie najo 41 na 20 muthingatanio, kaunti ya Siaya igikujira makarika 7.

Iguru ria makarika jau meeru ja Siaya minista Kagwe nathumbitie gikundi gia antu baria batumirite baruga cia urongo cia ugendi kuuma Kibra aja Nairobi gwita Siaya, akigwatira bata ya kwathikira marubuku ja kuuma Nairobi gwita kungi.

O kagitene kau nongerete kuuga ajie bangi 9 nibamburi kuuma cibitari na gwankia 375 mungana jwa baria borete kumana na virus ya corona.

Kiri nteto inthongi naugite gutirakujirwa gikuu gw akagita kau ka mathaa 24, na kwou mungana jwabio no 50.