Magat eng bunge nebo Senate kocheng oret nekiboisie eng pcheetab rabinik koitchi serkalisiekab county nenyorune kelchin county agetugul.


Kakon kurset rubeiywotab President William Rutto koitchi bunge nebo Senate kosirto oret nekiboisie eng pcheetab rabinik koitchi serkalisiekab county newendi konyorune kelchin county agetugul.

Ye kangongololi kangoitita konoret nebo bortaab Mama nebo MP nebo Aldai Cornely Serem eng sukulitab AIC Mosombor Primary eng Aldai county nebo Nandi komwa Rutto kole iyoni kole mite oret nekemuchi keboisie koitchin kayonchinet senetaek agobo olenyalu kepcheita rabinichotok asikonyorune kelchin bikab Kenya tugul komakipchei emet kobun oeng.

Kabit ngalalutikab Rutto kingomaitchin kayonchinet senetaek eng kasarwek 6 agobo oret nenyalu keboisie kepchechi serkalisiekab county rabinik.

Eng komastanyi komwa Senator nebo nandi Samson Cherargei kole bendi kosirtoi motion nemache kepchei rabinichotok keboisie kaitetab bik yetuiyo senetaek eng betutab ko oeng kasi.