Mache familia nebo askarindetab AP nekoboisie eng ofisitab DP Rutto nekokinyor kokakobet sobet kobit imanit


Mache familia nebo askarindetab AP John Kipyegon Kenei nekoboisie eng ofisitab rubeiywotab President William Rutto nekokinyor kokakobet sobet eng goinyi nemite Imara Daima eng yutok Nairobi keyai chigilisiet neititaat kosupkei ak meetnyi.

Ye kangongololi eng goinywa nemite kokwetab Chemasis eng Rongai county nebo Nakuru komwa Baba nebo askarindonotok John Chesang kole korus kwonget kongonyor logoiywek chetinyegei ak meetab werinywa kobun gorik cheiyoptoi logoiywek kanerekchi serkali eng mwaet kole konyalu konoisechi icheg logoiywechotok bo orogenet eng oret nebo utotiet.

Kates komwa Chesang kole komakotinye kaimutik alak tugul werinyi kingomandoi eng gaa eng betutab Jumapili ak eng notok kokwongchin kele kobargei ine kale magat keyai chigilisiet neititaat.

Eng komastanyi komwa Emmanuel Kenei netupcho ak askarindonotok kole kiiitita gaa Kipyegon eng betutab komut kasi ak komut lagok koba half term kongete Baringo komawegei Nairobi eng betutab Jumapili.

Kates kole kiru kwonget kingotiem kobirchi ine simet eng betutab ko oeng kasi kobate kimakochute simet agoi amu kongonyor logoiywek chetinyegei ak meenyi.

Kates komwa familia inotok kole maiyoni logoiywek chekimwoe kele koibetegei sobet Kipyegon kamach kobit chigilisiet ak keipchi kakwautiet icheget cheimuch kokotinyngei ak meenyi.

Kamwa agine kiruokindetab komasatak kole Kipyegon koko chito nekomakotinye ngal.

Eng mengotet nebo Imara Daima ole komenye Kipyegon kokairor bikab kokwet agobo ole kiingendo ine.

Kaibor kaimetabgei rubeiywotab President William Rutto agobo meetab askarindanotok bo AP nekoboisie eng ofisinyi.