Mache alak eng kandoikab dini eng Uasin Gishu serkali koisto ngatutiet neete bik chetinye kenyisiek 58 ak kwo barak komatkoitita kanisa


Kakokon kurset alak eng kandoikab dini eng county nebo Uasin Gishu koitchi serkali koisto ngatutiet neete bik chetinye kenyisiek 58 ak kwo barak ak lagok chemengechen komatkoitita gorik chekiyoe sautik amu nyumnyum konam miondo nebo Corona.

Ye kangongololi eng nganasetab Eldoret komwa kandoichotok kondochin Bishop Joel gatimu kole chechang eng kandoikab dini kotinye kenyisiek 58 ak kwo barak ak eng notok komakararan keete koitita sautik.

Kamwa Gatimu kole nyalu kechomchi bik tugul koitita sautik asikonyor kanetisiet nemokchingei.

Kora komwa kole lagok chemengechen kikochin kanetisiet eng kanisa kit nekale agoi kotoret kerekune managet nebo tibik chemengechen nekokwo barak eng emoni kongete kingeker sukul kosupkei ak mangunetab miondoab Corona.