Kurutwa gitini kwa Mwaura na gutaarwa kwa Leshore ta seneta wa kworotwa wa Jubilee


Mukariri giti wa antu bari na mawathe kaunty ya Isiolo Mohammed Abdulahi nameneeretie kiama kia Jubilee igutaara Sammy Leshore kuuyuria kanya kara karaari na Isaac Mwaura ta senator wa kworotwa.

Kulingana na Abdulahi, giti giku gitiraaya kweyanwa kiri muntu aari mbungeni kairi ara indi akwenda rais Uhuru Kenyatta athungiira kwona Leshore atiranyuithua muuma wa ubisi kurega ugu bakaandamana.

Bubu buthuute mbere wa rira mwingi na atongoria kaunty ya Samburu bakaathite itagaria ria kworotwa wa Sammy Leshore kuthukia kanya gaku ga senator wa kworotwa kurugamiira antu bari na mawathe.

Leshore aari mubunge mianka ya agu nyuma mbere ya gutaarwa ta senator wa kaunty ya Samburu mwanka wa 2013 indi aarutwa mwanka wa 2017, akari kaunty inu bari na witigio akaruta wira bura kubatiiri gitini giku.

Spika wa bunge ya kaunty inu Solomon Lempere natongoreetie abunge ba kaunty guchokeria nkatho mutongoria wa kiama kia Jubilee na rais wa nthiguru Uhuru Kenyatta nontu bwa kweyana kanya gaku kiri Leshore.