Kithure Kindiki kweberua ja munini wa spika wa Senate


Prof Kithure Kindiki neberetue ja munini wa spika wa mbunge ya Senate.

Akiaria kagita ka rwaria rwa kumweberia kwarirua Senate, Kindiki naugite kinya kethira atigwitikaniria na rwaria ruu, we atiunite watho kana kwagira rais Uhuru Kenyatta kiene.

Kindiki naugite ni untu bwa aibu senate kugita gikaro kwariria siasa cia kiama kia Jubilee ciegie kumweberia kanyene ka munini wa spika, kagita karia nthiguru iji yatiki ni mathiina mwanya, na akenya bakubatara ngerekana yajo.

Ni miario iria igwati mbaru ni maseneta ba murengo jwa Tangatanga batongeretue ni uria urari mutongeria w abaingi Kipchumba Murkomen na Mithika Linturi, bakiuga rwaria ruu nirukujirite weru ati mbunge niyagite uhuru bwayo na ati nthiguru icokerete wathanine bwa kibara, na ni ukunyaniri bunene kuuma kiri rais Uhuru Kenyatta.

Kunari uu maseneta ba Jubilee ba murengo jwa Handshake na jwa NASA, nibaugite itua ria kethira Kindiki akeberua kana ari ni ria gisiasa na ti ria kiwatho.

Maseneta bau batongeretue ni mutongeria wa baingi Samuel Poghisio na wa bakai James Orengo nibaugite kiama nigitete witikania na Kindiki na kwou batina bungi tiga ni kumweberia.

Kindiki eberetue nyuma ya maseneta 54 kuringa kura kugwata mbaru rwaria rwa kumweberia, 7 aki bakiringa kura kuregana naru.