Kawekchigei rasmi boisionikchik bunge eng betutab rani kongobata kamunget nebo kasarta negoi nebo arawetab 12


Kawekchigei rasmi boisionikchik bunge eng betutab rani kongobata kamunget nebo kasarta negoi nebo arawetab 12 ole kabit kaiweiset kele imuch koetchi bunge bolotet nebo Tangatanga ak Kieleweke eng kenyini.

Mite kaiweiset kele Mps cheindochin committees cheterter chelulchin komasta nebo Tangatanga koimuch keisto eng kandoinatet amu marobe eut President Uhuru Kenyatta yetesetai kowendi barak bolotet nebo BBI.

Kamwa Chief Whip nebo Mps chechang eng bunge nebo poror Benjamin Washiali kole mabo kamanut eng nguni istoetab kandoik chenamu boroinwek cheterter cheboto ine kale chamainyi inege netinye kamuget koisto ine.

Eng komastanyi komwa Speaker nebo bunge nebo Senate Ken Lusaka kole mite alak eng committees chekeyochin walutik missing ngotkoyonchin agobo notok membaek chebo committees ichotok.

Agot kounotok kokamwa kole notok koyookse eng kotugul yekitau kenyit.

Kakon kamuiset Lusaka ak Washiali komatkechomchi bolotet nebo Tangatanga ak Kielewekochut bunge kale ngotkoyaak notok koimuch kongemakis boisionikab bunge.

Kamwa Lusaka kole ko Speaker kowendi koyoe kit agetugul koker kole kakisub koitita ngatutikab bunge komakitestai ngalekab bolotet ak kaikimit komwa Washiali kole bo kamanut eng Mps kotoret serkali koboisiechi bikab emet.