Kakoit biik 6,366 che kikonam miondab Covid-19 eng emoni


Kokinyor biik alak 176 che kokonam miando nebo Covid-19 ole kotes koitet nebo ichek che kikonam mianotok eng emoni koit 6,366.

Notok ko kosubgei ak chigilisiet ne kokiyachi biik 2,410 eng saisiek 24 che kokosirto.

Yekangokonu kabarastaonotok komwa sirindet eng ministry nebo tililindo Dr Rashid Aman bichotok tugul kobo emoni chebo kongete kenyisiek 3 agoi kenyisiek 78.

Kamwa kole eng counties ko kokinyorchi Nairobi 99, Mombasa 20, Kiambu 17, Migori 13, Uasin Gishu 10, Busia 4, Makueni , Narok, Kisumu ak Kakamega ko kokinyorchi agenge agenge .

Eng kasaratak ko kokitiakta biik 26 che kokosopcho ole kotes koitet nebo ichek che kikosopcho koek 2,039

Angot kou notok ko koibet sobet biik alake 4 ak kotes koitet nebo ichek che kikobet sobet koek 148