Kakitechi mengik chebo komaswek chekokobaoryonchi boriet nebo bororiondit eng Nakuru kokimit kalyet ak kibakenge


Kokinyaa bik 13 eng siptalitab Nakuru Level Five kosupkei ak kakotonosiek chebo kipchabok chekonyor eng boriet nekobit eng komasta nebo Ndosua, Mariashoni ak Nessuit eng Njoro eng county nebo Nakuru.

Ye kangongololi kongorutechi bik chekinyoi eng siptalinotok komwa Governor nebo Nakuru Lee Kinyanjui kole kakotoi koyai ngalalutik chetokchingei ketar kabokchinosiek chebo bororiondit eng kwenutab bororiosiek oeng chemoiyechin mbaret eng kongasis nebo tumndoab Mau.

Kamwa Kinyanjui kole kakongololchi kandoik chebo komaswekab gaa koyai ngalalutik ak bikwak kongibete sobet bik somok eng borionotok koetchi komasta nebo Olposimoru.

Kakon kurset Kinyanjui koitchi mengik kokimit kalyet ak komengis eng kibakenge.