Kakinyor biik 2 chetindoi Covid-19 eng Kabarak University


Kabit arogenet eng Kabarak University eng county neboo Nakuru, yekankenyor biik cheboisie eng goriik che kitochee toek kotindoi miando nebo Covid-19.

Yekangoyani imanda nebo logoywechu komwa minister nebo somanet Prof. George Magoha kole kabit notok eng kasarta nekatetat kotestai eng wikini eng sukulinotok bo Kabarak tuiyetab somanet ne kotetei Kenya Institute of Curriculum Development.

Kosubgei ak notok ko kamwa Magoha kole kakoyaach kitelel tuiyonotok ko tetat kotuiyo delegates che itei 200, ole eng nguni ko kakimut biik 80 kobun komaswek che terterchin che kokaitita tuiyonotok koba komasta nekitabane biik che kibwatyin kotindoi miandob corona eng county nebo Nakuru.

Eng kasaratak ko kamwa Magoha kole ole uu ngalal eng nguni ko kokotestai koletagei miando nebo Covid-19 missing ne imuch konach komat keyaat somanet eng emoni kou ye kikakitet kele ketoi keyaat eng arawetab 9 kenyini.

Yekango ngalali eng tuiyet ne kayai ak ofisaek che telelelchin sukulisiekab muswoknotosiek eng emoni ole kakinalale akobo ortinwek che imuch keboisie eng yatetab sukulisiek, komwa magoha kole kotomo keyat ketesiosiechotok ko nyalu korok ko kakisuldae ngatutik tugul chebo girindaetab miandab Covid-19.

Eng kasaratak ko kangong kole rabinik che itei bilionisiek 8.2 chebo toretet che kikon World Bank, ko kibendi kelangune teeksosiek eng sukulisiek eng counties 30 cheboto teeksetab goriik che kitoretegei , laboratories ak goriik che kisomane.