Kakecher bikab Kenya kotestai kosub ngatutik chekikon ministry nebo tililindo eng kasarta nekonori borwekab chamanikwak


Kakecher bikab Kenya kotestai kosub ngatutik chekikon ministry nebo tililindo eng kasarta nekonori borwekab chamanikwak asiketer kayaptaetabgei nebo miondoab Corona.

Kamwa minister nebo tililindo Mutahi Kagwe kole alak eng bikab Kenya kolazimishani daktariek kowal walutik chebo chigilisietab chamanikwak chekaibet sobet kosupkei ak miondo nebo Corona asikobit komakilot kit nekale indei olengoi bororiet.

Kabit notok eng kasarta nekakinyor bik alak 599 chetinye miondo nebo Corona ak koyai kotesak ak koit bik 26,436 chekikonam miondoab Corona kongete koit emoni mionotok.

Ye kangongololi eng county nebo Kisumu kangokonu ngalalutik chebo kila betut kosupkei ak ole uu miondoab Corona eng emoni komwa Kagwe kole kakinyor bichotok kangeyochi chigilisiet bik 4,420.

Tesetai kondoi county nebo Nairobi eng bik chetinye miondo nebo Corona.

Kora komwa Kagwe kole kaibet sobet bik 2 kosupkei ak miondo nebo Corona ak kotes kaitet nebo bik chekokobet sobet kosupkei ak mionotok agoi 420.

Logoiywek chemiachen ko kakitiakta kaitet nemite barak missing kitiakta eng betut agenge nebo bik chekotinye miondo nebo Corona chekokosopcho chotok ko bik 1,062 ak koyai koit bik 12,961 chekokosopcho kongete koit emoni miondo nebo Corona.

Kamwa Director General eng ministry nebo tililindo Dr.Patrick Amoth kole asikobit kosob chito eng chokchinet eng kasarta nekinyoi eng gaa kolazima koistoegei kulsetab sigaret ak eisetab maiyek.