Ikuu bia ajie ba virus ya corona gwanka 6, makarika kwongereka mwanka 158


Mungana jwa ajie baria bakujiri barina corona virus aja nthigurune niwitite mbere kwongereka na narua nijwankite antu 158.

Rais Uhuru Kenyatta kiri ntumiri kuuma gikarone kia rais aja mucii munene natangacite antu 16 nkuruki gukujirwa kugwatwa ni virus ya corona.

Kuringana na mutongeria uju wa nthiguru, antu 4,277 nibathimi kuuma igoro, na bau 16 kugwatikana nibagwati ni virus ya corona.

O kagitene kau , mutongeria uu wa nthiguru natangacite antu bairi nkuruki gukua kumana na virus ya corona na kwou gwankia ikuu 6 bia baria bakwite kumana nayo.

Kunari uu kurina antu 4 borete virus iu ya corona.

Kumana na uria kuri aja Kenya, rais Kenyatta naugite o muntu no mwanka ari kaja ekire mask ya kumukaria atikagwatithue virus ya corona, na mono naria muntu agucemania na bangi o etite mbere na ngugi ciawe.

Nkuruki, naritite watho kiri rwangi rwa kigina rutumire shilingi bilioni 2 iria icokete kumana na mawaia ja nkukuu gutetheria antu baria batiguciumba kagita gaka, na oo kuria eene nyomba miciine minene baregerie gakanda nandi.