Guti kuuma kana gutonya kaunti cia Nairobi, Mombasa, Kilifi na Kwale, thirikari gutangaca


Thirikari nitangacite marubuku ja kuuma kana gutonya kaunti Nairobi, Mombasa, Kwale na Kilifi, kiri wiru bwa gutanganira na gutamba kwa virus ya corona

Rais Uhuru Kenyatta gukurukira ntumiri yawe kiri nthiguru kuuma gikarone kia rais aja mucii munene naungikite witi bwa antu gutonya kana kuuma mucii munene, kuuma thaa imwe cia narua ugoro gwa kagita ga ntuku 21.

Marubuku jau nkuruki nijaringithitie kaunti cia mbwaa cia Mombasa, Kwale na Kilifi kwambiria jumatano iji, aria gukethirwa gutina gutonya kana kuuma kauntine iu.

Mutongeria uu wa nthiguru oo natariritie guntu kuria kuringithitue ni marubuku jau kuria gwankene na mucii munene, akiongera ati mitaratara iu mieru itikuringithia kabiu iria itite na mbere.

Kunari uu naugite baria bagukamata biakuria na into bingi bia bata batiringithua ni marubuku jau ja kagita, indi borua no mwanka muntu ethirwe na baruga tariria kuuma kiri kambuni iria imwaandikite.

Rais Kenyatta nkuruki natariritie ati we kiumbe na thirikari bakagita bunthe buria bakuumba gukaria akenya kumana na mpanga iji ya virus ya corona.