Eserekari yaenanire chibesa chia abagotu ne chintakana


Eserekari yaenanire chisiringi chibilion 4.3 chigochi gotumeka goakana abanto abagotu, chintakana amo na abanto bare no oborema berigete goetera ase omoroberi o inua jamii abwo bagoakanwa chibesa ne eserekari kera omotienyi kwegendereria.

Omoriki obotambe ase ewizara ya social protection Nelson Marwa otebire buna egati ya abanto abwo chiribu 296,307 nigo bare abana chintakana amo na bari barwete chinka chitari kwenyara abwo bagochi goakanwa chisiringi ebilion 1.1.

Boigo abanto abagotu bare gwetania emiaka 70 berigetie ase omoroberi oyio chiribu 764,644 nigo bagochi goakanwa chisiringi chibilion 3.3 ase boigo abanto bare no oborema chiribu 34,094 bagochia goakanwa chisiringi chimilion 136.

Marwa otebire buna kera omonto gati ya abanto abwo nigo bagochi goakanwa chisiringi chiribu 4 chio omotienyi o 11 amo no omotienyi o 12 bwo omwaka oeta gochakera abwo ankio.