Ebirero bia abasae- bogirango maate


Abasae korwa ensemo yebunge ya bogirango maate ekaunti ya kisii nigo bemurunganirie igoro yechichera chibesa chiechibursary chikorwegwa ase ensemo eyuo.

bakoragwa na samwel botai, abasae abwo nigo bamiragire ekiara omojumbe bwensemo eyuo sylvanus osoro ase ogokeia ekerengo giechibesa chiabegetwe na omojumbe omokoro manson oyongo giechilifu ikomi goika chilifu ibere ase kera omworokigwa egento batebire buna necheche gochia ase aborokigwa abataka abwo bategemeete chibesa echio gosoma.

abasae abwo boigo nigo bamochirie osoro ase ogotabwata okoboko abasae bwensemo eyuo erio banyore chigasi egekogera abange babo nigo basomete korende tibaranyora meremo.

abasae abwo boigo nigo bemurunganirie buna nyuma yokoborwa emeremo na gosoa bodaboda erio benyorere eng’eria yabo ya kera rituko, oboonchoreria obwo nigo bwasinyire egekogera chipara chinyinge ase ensemo eyuo nigo chisaregete na tichirigoeteka ase engaki eye embura egotwa ime ya gusii.

nigo basabire omojumbe osoro koimokerera igoro nakobakorera emeremo bamoete erio ensemo eyuo nero esuke motwe ase ensemo ya amagenderero.