DCI kwambiria ucunkuni bwa ndene bwegie baria baringithirue ni mbaara cia gisiasa


Antu 18 baria baringithirue ni mbaara cia gisiasa cia mwaka jwa 2007/08 nibaandikithitie ntumiri na rwangi rwa uucnkuni bwa winyangia DCI iguru ria nyamario na mothuku jaria baakurukirire kagita ka mbaara iu.

Murungamiri wa rwangi ruu George Kinoti naugite thirikari nigucunkuna kindene uria antu baria baaringire mbaara iu cia gisiasa bagakanukua kiwatho.

Kinoti kiri gikaro na aandiki ba nteto nyuma ya gucemania na magana ja baria baaringithirue ni mbaara iu cia nyuma ya ithurano oo naithurite ati tayari ndwangi cia ukaria niciamukirite nteto ati kurina miena mingi aja nthigurune kuria uringiri miriga gwitite mbere na mpwii mono, akari bakiaga thiiri buru na kwagua mpia ni uguaa kumana na imakania biu.

Kinoti naugite thirikari tayari nikite mubango jwa kurwaa na mbaara o cionthe iria ikubangwa ni aringiri mwingi.

Ruterene rwawe gavana wa Uasin Gishu Jackson Mandago akirita uuge orio nyuma ya ntumiri ya Kinoti nonekanite kuthumbia miario yawe.

Oo wiru bwetu bwa gukinyira murungamiri munene wa kamiti ya kinthiguru ya uteteri kioto kia umuntu Benard Mogesha kwereca matua jaria jajukitue miaka 12 narua niburingite iiga akiuga agukari mucemanione gukurukira mutandao.