Chenro mar Kazi Mtaani e kar chung od bura ma Homa Bay Town


Piny owacho mamalo sani koro kao rowere maloyo alufu 3 mawuok e kuonde dak mong’ohore ma boma ma Homa Bay ma gidhi ndiko e tich e bwo chenro mong’ere kaka Kazi Mtaani mar goyone rowerego atho kaluwore kod wach ngima masani koro tek tweta ma okel kod wach tuo mar Coronavirusni

Rowerego ma kwan gi romo alufu 3 gi 197 idhi kao e kuonde dak mong’ohore ma Homa Bay kuno ma gin Shauri Yako , Makongeni , Sofia kod Got Rabuor e kar chung od bura ma Homa Bay Town

Ruodhi ma gwengego gi jolupgi gie sechegi jodhi nyime gi yango rowere ma gidwa kaogo ka moko kuom gik maduarore en ni rowerego jobed kod opande kendo nyaka gibed jogo ma hikgi ochakore e 18 nyaka 35

Magi ne oyangi kod County Commissioner ma Homa Bay kuno migosi David Kipkemei mane owacho ni rowerego igeno ni jobiro tiyo tije mopogore opogore mag kibarua kaka beto bunge manie geng apaya , yueyo otaro ma pii mochido kalee kod yueyo apise mag piny owacho mar Countyno kuom tije mamoko

Kanomedowuoyo ewii wachno migosi Kipkemei nowacho ni piny owacho ochano kao rowere mawuok e kuonde dak mong’ohorego nikech wach ngima makoro tek mokal gi biro mar tuo magalagala mar Coronani

Kanowuoyo gi jofuamb weche e apise e boma ma Homa Bay , jatelono nowacho ni rowerego jobiro yudo silings 455 e odiechieng ka odiecheing kuom ndalo 11 kowacho ni chenrono geto gonyo ngima ne rowere mane jowito tijegi nikech wach biro mar tuono