Category Archives: wimwaro fm

Akenya kuria mutongoria wa vururi Uhuru Kenyatta kuvingura vururi


Mutongoria wa vururi Uhuru Kenyatta aina kavinda karito agicurania kuvingura vururi kavinda gaka virus cia Corona irathii na mbere kwongerereka kana kuthii na mbere kuvinga na utonga wa vururi uvaragane. Mama ni mathina maria magumirite Rais Kenyatta guku akenya makivoka ndumiriri ya Rais ya kana agatecaniria mikana iria ekirite niguo kugiria murimu wa Corona gutamba.




Kenya kwandikithia andu 389 aria maina murimu wa Covid 19


Kenya niyandikithia namba nene muno ya arwaru a murimu wa Corona vuva wa andu 389 kuthimwa na kwonekana na virus cia murimu uyu na gukinyia andu 7,577 aria maina murimu uyu guku vururiri rungu rwa mathaa 24. Andu aya 389 monekanite vuva wa andu 4,829 kuthimwa na kwonekana na murimu uyu . Ministry ya ugima wa mwiri yugite arwaru 266 ni andu arume guku 123 magikorwa ni atumia na maina gatagati ka mwaka umwe na miaka 93 . County ya Nairobi niyo itongoretie na arwaru 248, ikirumirirwqa ni Kajiado na arwaru 36, Kiambu 27, Mombasa 23, Busia 17 , Machakos 10, Migori 9, Kitui 6, Makueni 3, Uasin Gishu 3 , Nakuru 2 , Kilifi 2. Garissa 1, Muranga 1 na Narok 1. Namba ya andu aria mavorete ikinyite 2,236 vuva wa andu engi 88 gwitikirua kwinuka mucii .




Arimi county ya Embu gutarwa kuthondeka co-operative


Guku nthi igikunguira muthenya wa miungano (cooperatives day), arimi thiini wa kaunti ya Embu nimataritue kunyitanira na kuthondeka miungano minini iria ikumatethereria kumariria biashara na urimi wao. Kuringana na mutaaramu wa maundu makonie wonjoria, Mwangangi wa Mbiti niati, arimi marikia kuthondeka miungano iyo marorererie maundu mengi ma gwikuria nwa ti kuroragiriria tu uvoro kwigaga mithithu ya mbeca. Augite ati magie na umithio thiini wa miungano yao nwa nginyagia makorwe mari rungu rwa miungano minene iria iratamburikana ni thirikari.




Abunge 4 kuma county ya Kirinyaga marenda kuthurwa kamitiri cia vinya thiini wa bunge ya vururi


Abunge onthe a county ya Kirinyaga aria mathuritwe bungeri ya vururi nimauritie utongoria wa kiama kia Jubilee umave iturwa iria ingimavotithia gutethia mwingi uria wamathuriire. Abunge aya maugite ivoya riao ni kuvewa iturwa cia kamiti iria irarumbugia ukinyaniria wa itugi 4 cia uthii wanambere iria mutongoria wa vururi Uhuru Kenyatta. Mubunge wa Mwea Kabinga Wachira augiite marenda gukorwa muvariri wa mbere niguo kunyitanira na mutongoria wa vururi mivangori yake ya gukinyaniria ciiraniro iria erire mwingi wa vururi akiuga nimandikiire mutongoria wa abunge aria engi bungeri ya vururi Amos Kimunya makiendekithia iturwa iria marenda.




Uria wai senator wa Machakos Johnstone Muthama kuga niakuthondeka kiama giceru


Uria wai Seneta wa Machakos Johnston Muthama augite ndarerira kuthama kiama kia Wiper kiria gitongoragua ni Kalonzo Musyoka na kuga akathondeka kiama giake mithenya minini niguo kingethanire na kiama kia Wiper. Muthama augite athamire kiama kia Wiper mwaka 2017, na makiria vuva wa Kalonzo kuthura muvici Kennedy Kalonzo kurugamirira kenya thiini wa bunge ya East Afrika mugaru na mwivoko wa kiama. Augite mworoto wake wa kugwata mbaru mworoto wa munini wa Rais William Ruto kuvuranira urais utikainainua ni mikana ya Wiper.




Maovitha a polithi kwambia uthuthuria vuva wa mutumia kuraga mwana na njira ya kumwikia kithimari


Maovitha a polithi county ya Embu nimambitie kuthuthuria giko kimwe varia mutumia umwe urekuirwa kuraga mwana wake na njira ya kumwikia irimari na kugeria kwiyuraga iturari ria Kang’ethiri mwena wa Gikuuri . Kurerikana mutumia uyu araikirie mwana wake irimari mbere na gucoka gwiikia niguo makue vamwe nwati avonokua ni ekari a itura riu. Ekari maugite kwina uvuthu mutumia uyu aregerrire ngero iyo niundu wa muturire kurituva.




Murugamiriri munene wa Kebs gwikua ngono ni kuthoga uthuthuria


Kamiti ya kurua na ungumania guku vururiri EACC niikitie ngono murugamiriri munene wa ruvonge rwa kurumbugia wagiriru wa indo guku vururiri KeBs Benard Njiraini. Kamiti ino irakuma Njiraini niundu wa kuthoga uthuthuria wigii kandarathi cia kumurika indo iria irendua nja wa vururi, thimu na indo ciingi. Kamiti ino yugite Njiraini akoretwe akithuthurua varia ni vamwe na kwirwa avecane maratathi maria marendekana nwati akarega na kuthoga uthuthuria uria ukoretwe ukithii na mbere.




Covid-19: Thirikari kurongoreria kurugura utonga wa vururi ivinda riri ria Corona


Munini wa minister thiini wa ministry ya ugima wa mwiri Dr. Rashid Aman augite ndereti ya kuvingurwa kwa utonga wa vururi ti ya kurirwa, nwati auria mwingi woce ikinyo ria kurua na gutamba kwa murimu wa Covid-19 guku vururiri.

Thiini wa ndumiriri yake ya kimuthenya igie murimu wa corona, Aman augite guku thirikari cia county makirongoreria gutenga itanda 300 cia mwanya thiini wa macounty mwingi naguo uvatie kurumirira mitaratara iria igitwe ni thirikari niguo kunyivia number ya aria maranyitwa ni murimu ucio.

Minister wa kithomo Profesa George Magoha akanyiriritie kuga nimakuthii na mbere gucira niguo kuthondeka mitaratara miega iria ikarumirirwa cukuru ciavingurwa.

Akiaria vuva wa kuthondeka mucemanio na atongoria a ruvonge rwa kithomo, Magoha augite kwina vinya wa kuvingia mitaratara iyo gukiririkanagwa wega ministry ya ugima wa mwiri yugite murimu wa Covid 19 ugakorwa ucacite mweri wa kenda, mweri uria cukuru ikavingurwa.

Kunai uguo augite mwerekera ukarutwa ni mutongoria wa vururi Uhuru Kenyatta kiumia giukite.

Mwena wa aruti wira ruvongeri rwa urigitani kuvitukira miungano yao nimauritie rais Uhuru Kenyatta kuvingura utonga wa vururi nwati ti cukuru cia Primary na secondary wa undu umwe na makanitha.

 




MCAs kuma ya county ya Embu kuva mbeca cia kwigana kwi gavana Wambora


MCA kuma county ya Embu nimeririte kuvecana mbeca cia kwigana kwi gavana wa county ya Embu Martin Nyaga Wambora kurikia mirandi yake niguo gutiga rita riega vuva wa miaka yake ikumi ya utongoria ta gavana wa Embu.

Munini wa spika thiini wa mbunge ya county Steve Munene Simba augite gavana akavota gutumira mwigana wa billioni 1.5 kwi mirandi yake kumanagia na siringi billioni 1.95 cia mirandi ya uthii wanambere thiini wa mwaka wa kigina 2020/2021.Financial Year. Simba however called for the sparing of the Ksh 400 Million Ward Equalisation Projects kitty.

Munene uria ni MCA wa Runyenjes Central endekithitie siringi millioni 400 itumirwe thiini wa mirandi ya wardi .

MCA acio maugite mavete gavana Wambora mbeca icio niguo arikiririe mirandi yake niguo matukuri maukite akaririkanagwa na record mbega ya uthii wanambere ta muteti guku akivokwa kurikia itina riake ria utongoria ta gavana 2022.

Kavindari wakau MCA wa Mavuria Ngari Mbaka niwendekithitie mwena wa mbeere utigatigirirwe mirandiri iyo niguo gukinyaniria wigananu thiini wa county yonthe.

Athiite nambere kuga wardi imwe nituthukanagua maunduri ma uthii wanambere.

Ni miario inyititwe mbaru ni munini wa mutongoria wa aria anini thiini wa mbunge ya Embu Newton Kariuki akiuga mwena wa mbere ukoretwe na mathina ma manji, varavara mbega na mathavitari,.

Kariuki uria ni MCA wa Muminji augite angikorwa gavana niurenda gutiga ritwa riega nwanginyagia arutanithie wira na andu ambeere.

 




MCA county ya Embu kuva mukana atongoria athirikari ya county aria magondererete wirari wao


Amwe ma arugamiriri a ardi kuma county ya Embu nimakumite maovitha a thirikari ya county aria makoretwe matakuruta wira uria kuvatere.

Matongoretwe ni munini wa spika Steve Munene Simba maMCA acio nimakumite atongoria a county aria makoretwe magondererete wirari wao guku makiamukira micara minene na wavithi cia gikirwa kia neguru cia county na ngari nene matakurongoreria uthii wanambere.

Simba uria ni MCA wa Runyenjes augite gutina MCA wivariritie kurirwa ni giti giake niundu wa ugondereru wa atongoria a county.

Mwena wake MCA wa Evurore Duncan Mbui niukumite ateti aria makoragwa muvariri wambere kumurika MaMCA niundu wa gukanirira na gavana mavinda monthe riria gwakorwa na ciuria niundu wa kuthondekwa kwa mirandi ya county uria gutavatere.