Category Archives: ramogi fm

Njore mar obila Kisumu


Riwruok makedo ne ratiro mar oganda Haki Africa okone jotelo mag county ma Kisumu mondo mii jochiewu kendo kwedo sand ma jopiny kadhe e lwet obila e kindeni ma irakruok gi midhusi mar Coronavirus.

Director mar Haki Afrika Khalid Hussein wacho ni jopiny ojwang’ kendo owegi e lwet nono kata bedni obila moko rocho ratiro maggi.

Okoo ni gisendiko piny ripode mag jii ma okadho e sand e lwet obila to kod mago ma owito ngima e ecounty ma Kisumu nikech timbe obila; ka ranyisi en jago a nyocha othoo e sub county ma Kisumu West kane obila timo apedha mar manyo jii ma ok rwak otembni ma umo dhok kod um kata mask.




Jo ohala ma chiro Wiyetek e Sub County ma Ndhiwa joduaro ni piny owacho mar County okonygi tieko yuarok mosebedo ewii loo moro ma chirono


Jo ohala ma chiro Wiyetek ei East Kachieng Location , e Sub County ma Ndhiwa e County ma Homa Bay sani koro joduaro ni piny owacho mar County ma Homa Bay kuno odonjre e wach loo moro ma chirono ma osebed ka ilaro mabende osetamogi e tayo ohandgigo e yoo mowinjore

Jo ohalago jowacho ni gisebedo ka giyudo pek e tayo ohandgigo e odiechieng ka odiechieng ma gidhiye chiro kuno niiech wach yuaruok ma obedo e wii lobno mabende koro osebedo kuom higni buora

Kanowuoyo ewii wachno jakom chiro Wiyetekno migosi Nicholas Ochieng Alela nowacho ni nitie dala moro man machiegni gi chirono ma oyako bath loo ma ogerie chirono ma giwacho ni margi ma omiyo gisebedo ka gidagi ni jo ohalago okne loki kanyo

Kanomedowuoyo ewii wachno migosi Alela nowacho ni dalano osebedo ka puro bath puodho ma ogerie chirono kendo komoe cham mopogore opogore kagiwacho ni mano lopgi

Nowacho ni giduaro ni piny owacho mar County odonjre e wachno mar tieko yuaruogno mondo mi jo ohalago joyud kama ginyalo lokoe

To kumachielo bende , jo ohalago ne jokwayo piny owacho mar County ma Homa Bay mondo jotemie tieko gedo mar choo moro mar chirono mabende gedo mare osebedo ka ochung nyakane chak gedo mareno chiegni higni 2 mokalo

Jatelono ne oyuak kawacho ni deko e tieko gedo mar choono keto ngima jo ohala maloko e chiro Wiyetek kanyo kamarach mag gamo tuoche kaka mar nyaldiema kod mamoko migamo nikech bedo e aluora mochido




Jii 278 mane oyudi ei kawuononi nigi midusi mar Coronavirus


Kwan jogo ma oyudi ni jonikod tuo mar Coronavirus ei kawuononi gin jii 278 makoro kelo kwan jogo duto man kod midusino e pachoka chopo jii alufu 5 gi 811

Jii 278 go ne oyudi kuom kwan jii alufu 4 gi 74 mane opim ei seche 24 mokalo

Magi ne oyangi kod jalup jatend migao mochungne yoore thieth e thurka laktar Mercy Mwangangi mabende nowacho ni nitie jii 31 mane ochango ei kawuononi makelo kwan jogo duto ma osechango e pachoka chopo jii alufu 1 gi 936

Kanowuoyo gi jopiny kachiel kachiel e tipo mar telebisen kowuok Afya House e boma ma Nairobika laktar Mwangangi nowacho ni kwan jogo duto makoro osepim ne tuo mar Coronavirusno e pachoka gin jii 162,478




Komiti mar bunge mar Senate opuodho gavana Waiguru ni ler ka pamba


Komiti mar bunge mar Senate manyochane ochuogi mar nono wach ombulu manyochane MCAS ma County ma Kirinyaga jogoyo mag thicho oko e apis governor margi mikai Anne Waiguru koro kawuono ne jopuodho governor Waiguru ni ler ka pamba kaluwore gi weche mibadhi mane make mane omiyo ogo ombulu mar thiche oko e apisno

Komitino mabende ne otelne kod Senator ma Kakamega migosi Cleophas Malala nowacho ni kata obedo ni ne nitie weche modhuro mane odonjnego governor Waiguru kamano ni to bunge mar County ma Kirinyaga ne ok ogolo neno kata rang’isi moromo madine tud Waiguru gi weche mibadhi , tiyo marach gi apise kod ketho chike mag chiwo tender kata orage mane iwacho kuomego

Moko kuom Senators mane oting’o Amos Wako kod Ochilo Ayacko ne josiro ripot mane osom kod jakom komitino migosi Malala nogono kane giwacho ni ripodno olero malong’o thuond weche mane luoro Waiguru mane omiyo ogo ombulu mar thiche oko e apisno

Katakamano moko kuom Senators mane oting’o senator ma Nandi Samson Cherargei kod nyawadgi ma Elgeyo Marakwet Kipchumba Murkomen ne jopingo ripodno kagiwacho ni en ripot mane oyiengore nyakonchiel ni kendo en mane olosi gi weche mag siasa e iye




Ringre ja klas 10 moro ne ogol e pii e bur kware e gweng ma Aluru e Sub County ma Rarieda


Koro gikone to ringre japuonjre moro ma ja klas 10 mane otho e pii e bur quarre mane ikunye maram e gweng ma Aluru ei East Asembo Location e Sub County ma Rarieda e County ma Siaya ne ogol e bur quarre kanyo

Magi ne oyangi kod jalup jatend obila ma Sub County Rariedano migosi Thomas Ototo mane owacho ni ringre rawerano ne ogol e pii e bur quarre kuno e okinyi makawuononi ka chenro mag gole e piino ne otaa kod jogweng kod telo mag loch nanga makono

Shadrack Otieno Abuok ne rik odhi lago jamni machiegni gi bur quarreno emane okierie ma oluar e pii e bur quareeno mabende pii ne opong’o ma ogado pii ma ochwe otho




Waluke nyalo chamo oganda iye kuom higni 7 kata golo fuai mar silings million 7


Koro gikone to jaod bura ma Sirisia migosi John Koyi Waluke ong’adne buch twech mar higni 7 kata golo fuai mar silings million million 700 kaluwore gi bura mane oloye e ketho mar mibadhi mar oduma maromo silings million 313

Odumago ne onegobed ni itero ne National Cereals and Produce Board

Migosi Waluke ne odonjne kanyakla gi Grace Sarapay Wakhungu kod kambi mar Erad Supplies and General Contracts Limited -kambi miwacho ni ne margi

Waluke gi Wakhungu kokalo kuom kambi margi mar Eradno ne jonegobed ni jotero oduma maromo metric tonnes alufu 40 ne joka National Cereals and Produce Board e hik 2004 kucho to ne ochwe ochulgi omenda maromo silings million 313 mondo mi ne gitim mano to ne gichweyo maok gitero odumago ne NCPB kakane onegobed ni gitimono.




Ng’anyo mar lakteche Kisumu ochungi


Doho ma Kisumu ochungo ng’anyo mar jochiwu thieth madhii nyime e county ma Kisumu.

Jayal bura Nduma Nderi okone jochiwu thiethgo mondo mii jodog e tich ma ok okadho tich abich mar jumani.

Jayal burano kata kamano ok owacho ni ng’anyo mar jochiwu thieno ne ok en ma ratiro; ogolo chik ne tend county ma Kisumu mondo mii onee ni jochiwu theithgo omed lemo kakowinjore ma ok okadho tarik 30 mar dweni.

Piny owacho ma Kisumu bende omii chik ni bang’ medo jochiwu thieth lemo, chulgi osara moromore gi lemogo kochakore dwee mar 7 higa mokalo kendo chudo makamago timre ma ok okadho tarik 30 mar dwee manyien ma ka ok kamano to gin kod thiuolo mar luongo ng’anyo manyien.

Piny owacho mar county ma Kisumu ne odhi doho dhii donjo ne riwruok mar nurses, riwruok mar lakteche kod jochiwu thieth mamoko ma ng’anyo margi dhii nyime kendo ma kawuono ne odonjo e juma mar 2.




Gavana Ngilu idwa thichi e apis


Gavana ma county ma Kitui mikayi Charity Ngilu bende oyudore e kamarach kaluowre gi paro mar twak ma opedhi e nyim spika mar od bura ma Kitui mar dwaro ni thiche oko e apis.

Jatend kweth jogo mathoth e od bura ma Kitui ne ochiwo parono ma lero ni mikayi Charity Ngilu ok osebedo ka tayo chenro mag apis gavana e yoo ma ratiro.

MCA ma ward ma athi migosi Peter Kilonzo ma ong’ere gi nying oledhi kaka Tangawizi ema oloso parono.

Milome ma ochiwu ne jopiny yango romo ma kende mar od bura ma Kitui ibiro bagi cheing’ wuok tich juma manyien mar yalo mar ka bende owinjore gole gavana Ngilu e kom kata ooyo.




Samas mar mako Rege ochungi kuom ndalo moko kaluwore gi wach tuo mare


Doho ma Homa Bay koro ochungo kuom ndalo moko samas manyochane gigolo mar mako jaod bura machon ma Karachuonyo midusa James Rege kaluwore gi wach dende miwacho ni ok ber ruok mamiyo kaka di ochopi e nyim doho bedo matek

Dohono ne ong’isi ni midusa Rege sani nie Ward e kar thieth ma Nairobi Hospital maok onyal chopo e niym doho dhi duoko penjo ewii ketho modonjnego mar tiyo marach gi mbii mar apise kod mindni gi omenda jopiny

Midusa Rege odonjne gi ketho mar mindni gi pes CDF ma kar chung od bura ma Karachuonyo maromo silings alufu 909 gi 398 e kinde mane enie jaod bura ma Karachuonyo kuno kiwacho ni pesago ne gilalgo kokalo kuom orak mar ng’iewo gige thieth ne kar thieth ma Kendu Adventist Hospital e kar chung od bura ma Karachuonyo kuno mane otiye kaka mjumbe

Okil mar jaod bura machonno migosi Ishmael Nyaribo ne ong’iso doho ni Eng. Rege nie Ward ma onge kaka onyalo chopo e niym doho

Okindno wacho ni Eng.Rege ne ok ong’eyo ketho ma odonjne godogo kod bende koso ng’eyo weche moko ni ne nitie samas mane oorne ni mar make ni mondo otere e nyim dohono kane ogolo obok mane ng’iso ni midusa Rege nie osiptal ma enie Ward kaachiel gi kwayo doho mondo omi Rege kinde mondo ochang mondi eka bang’e bi luonge e nyim doho

Ne okwayo doho mondo omi midusa Rege dwe achiel ma ochango godo

Bang mano jang’ad buche e dohono Thomas Obutu ne ogolo chik mondo Eng. Rege obi ochopi e nyim dohono tarik 14 mar dwe manyien ma odhi tuomoe wach bucheno

To kumachielo bende jago moro ni Kennedy Ochieng mane odonjnegi kanyachiel gi midusa Rege bende ne omi chik mondo jobi ochop kanyachiel gi jaod bura machon ma Karachuonyono e doho kuno tark 14 mar dwe manyien ma owachino

Doho ma Homa Bayno nyochane ooro samas chieng tich 5 mar juma mokalo mondo mi ne maki midusa Rege mondo otere e nyim doho ne ketho mag mibadhi mane odonjne godogo




Jo ohala ma Kisumu maloyo 500 igeno ni jodhi yudo sitols e chiro manyien ma Chichwa


Manager mar Kisumu City Dorice Ombara kawuono ogoo dhoge piny kowacho ni maloyo jo ohala 500 ma onegobed ni joyudo sitols mekgi mag uso e chiro manyien ma Chichwa igeno jodhi yudo sitols mekgigo machiegnini

Kanomedowuoyo ewii wachno Ombara nowacho ni tend City ma Kisumuno osetieko chenro mag hiko barupe kod obok mamoko ma idhi miyo jo ohalago mang’iso sitols ma omigigo kod winjruok ewii yoo ma gidhitiyoe e sitolsgo

Jo ohalago emane rik odar e geng apaya ma Oginga Odinga apaya ma Ang’awa kod Kenyatta Avenue e boma ma Kisumu kuno

Jatelono nowacho ni jo ohala 509go kod mamoko 240 ma jobiro dhi loko e chirono mabende ni machiegni gi alap ma Kisumu Sports Ground jonegobed ni koro jodhi chako kao barupego

E tuak mane obedo godo gi jofuamb weche Ombara nowacho ni City ma Kisumuno bedo jonie lalruok kod bad migao mochungne weche mag ohala e County ma Kisumu kuno ewii wach kuayo mag jo ohalago mondo omigi hola moro ma iduoko mos mos mondo ogonegi atho kaluwore kod midhiero ma gisekalee mokel gi wach muoch mar tuo mar Coronavirus e thurkani

Nowacho ni tend City ma Kisumuno ochiwore gi yoore duto mar neno ni jo ohalago jodhi e chiro manyienno e yoo mayom maonge koko kata pek moro amora.

Chirono ne oyau ayanga gi governor ma Kisumu kuno ngire Anyang Nyong’o dwe achiel mokalo bang’e kane ogere gi kony mane owuok e bengi mar piny mangima -World Bank