Category Archives: muuga fm

Kamishna wa Isiolo Harman Shambi kuwata mutino wa barabara


Kamishna wa kaunty ya Isiolo Harman Shambi noonokerete besu nyuma ya kugwata mutino wa barabara nteere cia Narumoru ugoro bwa igoro.

Kamishna uyu ariirikana kugwata mutino aumiite Isiolo kuuya aaga Nairobi eethithitie wengwa na nkari yake ara akuirikana kuringana kiongo wa kiongo na trela ya maguta ma petrol.

Agikuuyira ikarika riru, kamishna wa kaunty ya Nyeri Loyford Kibaara naugiite Shambi atiragwata maringangirwa mathuku na nathiite mbere kuragurirwa cibitari ya Outspan mujii wa Nyeri.

Munini wa kamada wa borisi kaunty nini ya Kieni West Jackline Gacheri augiite nkari iri ciiri iri gituoni kia borisi kia Narumoru na dereba wa trela inu kinya wee atirawata maringangirwa na uchunkuni ibuthiite mbere kumenya kaumo ka mutino uyu.

Kamishna Shambi natumenyithiitie akaathi mbere gukara cibitari kulingana na mataaro ma dagitari kaingo guchubirwa nkuruki.




Arsenal kuruta Liverpool kiri mashindano ma Carabao


Goalkeeper wa Arsenal Benard Leno naraangurire mikwaju yiiri ya penalty na kuumbithia timu inu kurutaruta Liverpool kiri mashindano ma Carabao

Nyuma ya timu inu kuthiria darika cia mbere 90 iri draw ya 0-0 kienini kia Anfield, mucetho uyu utiraari na bungi tiga kumenya mushindi gukurukiira penalties.

Mohammed Elneny narateere penalty imwe ruteere rwa Arsenal nabo Divock Origi na Harry Wilson beebonera ciago ikirutwa i raia uyu wa nthiguru ya Germany.

Kiri micetho yiingi ntugu ya igoro, Aston Vila ibaratandikirwe bari mujii kienini kia Villa Park i timu ya Stoke City gukurukiira ibao rea Sam Vokes

Nwee ura aari mucethi wa Chelsea Said Benrahma naraingiirie mabao 2 na kuumbithia klub giake kia Brentford gutandika Fulham 3-1.

Arsenal indi igaakomana na Man City neo Everton iwaate ugeni Man United kiri quater finals cia gikombe giku gia Carabao.

Stoke bakaawata ugeni Tottenham Hotspurs kienini kia Brittania neo Brentford imenyane na Newcastle.

Micetho yonthe ya quater finals iriirigiirwa gucethwa tariki 22 mweri wa 12 mwanka uyu.




Waaki bwa kieni kia Marsabit gukinya 65%


Kamiti ya ukuria kaunty ya Marsabit niriungiite kwona bura muradi wa waaki bwa kieni kinene kia Marsabit uthiite mbere.

Batongoreetue i kamishna wa kaunty inu Paul Rotich, akiama ba kamiti inu baugiite mworoto wa ndiunga yaago ikwona kana ngugi inu nikuruthwa bura kubatiiri.

Rotich augiite waaki bwa kieni giku bwari buriikie muthia wa mweri wa 8 mwanka uyu indi nontu bwa itumi mwanya untu bubu bwarema na tariki kuirwa mbere mwanka muthia wa mwanka uyu.

Muradi uyu waathuriritwe Kshs 295m i thirikari nene neo kaunty ya Marsabit yaaruta Kshs 78m cia waaka ibanda binene kienini giku.

Waaki bwa kieni giku ibukinyiite 65%, mukadarasi ura ari na ngugi inu akiurua kurutha buri mpwii.




Omar Boga gushinda tigiti ya ODM Msambweni


Omari Boga agaakamata bendera ya kiama kia ODM kiri ithurano binini bia ubunge gishigo kia Msambweni tariki 15 mweri wa 12 mwanka uyu.

Boga eewatirite tigiti ya kiama giku nyuma ya gushinda kiri mchujo ntugu ya igoro ari na kura 6183 na ura barashindanaga nwee Nicholas Zani aawata kura 530 kiri ituo 61 bira biratumikaga kiri uringi kura inu.

Ithurano binini bia Msambweni biriruthwa kuuyuria kanya kara gaatigirwe nuura aari mubunge mututigi Suleiman Dori ura aakuire mweri wa 3 mwanka uyu.

Akiaria nyuma ya gutumiirua ta mushindi, Boga naugiite ari na witigio ukeegua agishinda kiri ithurano bibu i kira akuuga Msambweni igaaru ya ODM na itithungirwa imuntu atari muigaaru.

Boga akaamenyana na bangi 10 kiri ithurano bibu binini bia Msambweni areogo Feisal Dori ura akuirikana kugwatwa mbaru i munini wa rais William Ruro na murengo wa Tangatanga.




Hustler Movement kumeneerua


Muradi wa munini wa rais William Ruto kweyana wheelbarrow na mikokoteni nuthiite mbere kumeneerua anene ukiweetwa ta njira ya kuthaika mathugaania ma mbeu mbithi.

Mubunge wa Kisumu ya gatigati Fred Ouda augiite kira kiri na gitumi ikurutha mibango imiganu ta thirikari kwona mbeu mbithi bakwona wira kaingo baumba kuirugamiira utuuroni.

Akiaria ari mujii wa Kisumu, Ouda augiite wheelbarrow na mikokoteni ira mbeu mbithi bakwegwa i munini wa rais ikathuka nwa kana bagachoka kairi kwegwa mbeca cia kuruthithia untu bura butaumbikana.

Naugiite thirikari ibatiiri kwona kuri na ngugi cia kugana na kuri na riera riega ria biashara gukuuyiria abishara ba ome bara gukurukiira ngugi ciago bakaandika mbeu mbithi baingi.

Nauriitie mbeu mbithi kuimenyeera na gutiga gutumirwa ta ngati ya atongoria bara bakwenda iti kiri ithurano bia mwanka wa 2022.




Rais Uhuru kuuga atibunjia mbunge


Rais Uhuru Kenyatta naugiite atiri na mubango nwa uriku wa kubunjia mbunge kuringana na mataaro ma mugambithania munene David Maraga.

Kiri rwaria rwa mwanya na TV ya France24, rais Uhuru augiite kubunjua kwa mbunge tikuuga ntuuyia ukeegua kuri na uganaanu bwa antu aka na antu arume kiri atongoria bara bagaatarwa.

Amwe noogu, naugiite eetereete kwigua bura koti ikauga nyuma ya igamba kuirwa kotini kuregana na wendekithia bwa Maraga riru arute mwerekera.

Nkuruki, rais Uhuru narutiite mukana wa siasa cia kagiita gaka akeonekana kulenga munini wake William Ruto.

Naugiite mworoto munene kagiita gaka ikurutira akenya wira na kwona kuri na ngwataniro aaga nthiguru na kagiita gagakinya ga siasa rira akauga ura akaawata mbaru kiri ithurano bia 2022.




Kalonzo kuriunga Taita Taveta


Mutongoria wa kiama kia Wiper Stephen Kalonzo Musyoka nathiite mbere na ndiunga yaake gishigo kia mbwaa ara ntugu ya imunthi ariungiite kaunty ya Taita Taveta guchwaa ugwati mbaru kuruira urais mwanka wa 2022.

Kalonzo nakuirigiirwa kuriungira mbunge ya kaunty inu mbere ya kurutha mucemanio wa mwingi mujii wa Wundanyi ara ukeegua ari na atongoria mwanya ba Wiper areogo mubunge wa Wundanyi Dan Mwashako.

Nkuruki, munini uyu wa rais wa tene nakuirigiirwa kuringira debe muruiri giti kia wadi ya Wundanyi/Mbale na tigiti ya Wiper kiri ithurano binini bira bikaaruthwa tariki 15 mweri wa 12 mwanka uyu.

Aringi kura wadi inu bachokeete debeni gutaara MCA nyuma ya ura aari MCA Beatrice Mwabili wa kiama kia ODM gukua mweri wa ithatu mwanka uyu.




Njogu kuira arimi hasara, Nkando Buuri


Arimi ntuura ya Nkando wadi ya Kiirua Naari Buuri ibakuririra thirikari ya kaunty gukurukiira rwong’i rwa urimi kuriunga mindani yaago na kwona hasara ira bagiite kuumania na njogu na kubaa utethio.

I kagiita kara baumeneeria rwong’i rwa KWS ikwaaga kuthukiria njogu inu itagaaria amwe na kwigua ibaringiite riboti yaacio kwa igiita na batikuriiwa hasara ira bagiite.




Kurugurwa kwa irabu bia nchobi kugwatwa mbaru


Ngwataniro ya eene irabu bia nchobi na ma-hoteli kaunty ya Tharaka Nithi nikaathite itagaaria ria rais Uhuru Kenyatta kurugura biashara inu nyuma ya kuingwa wa nkeruki ya mieri 6.

Gukurukiira mukariri giti waago Nicholas Mutua, abiashara babu baugiite untu bubu bugatema antu baingi bachoke ngugini indi bakiromba thirikari kubateetheria kuriukia biashara ciago.

Nabo eene hoteli nteere cia Kiirua Buuri ibakeneerete kuthiyaangua kwa thaa cia kabiu na kurugurwa kwa biashara inu ara baugiite bakathingatiira mawatho ma kurigiiria gutamba wa corona bura kubatiiri.




Cibitari ya Tenri kumeneerua


Nja imwe kuuma Gakwegori gishigo mbunge kia Manyatta kaunty ya Embu nikwenda machokio kuuma kiri cibitari imwe ya muntu kiumbe kaunty inu nyuma ya mwendwa wago gukua akiegwa mwana, amwe na kaana gake.

Mwekuru uyu wa ukuru bwa mianka 39 ariirikana gukua akiruthirwa operation ya kwegwa mwana kiumia kithiru cibitari ya Tenri Ena, Runyenjes.

Mukuru wa mwekuru uyu augiite airire mwekuru wake cibitari ya Tenri mujii wa Embu Nchumaa ya kiumia kithiru rukiiri indi akumutiga aathamirua Runyenjes atamenyithitue.

Kulingana na riboti ira ntomuru uyu eerwe i cibitari, mwekuru uyu aathinjirwe akuirwa Runyenje indi mwana aarutwa ari mukua, na nyumani thaa inya cia utugu eerwa mwekuru wake kinya wee agukua.

Dagitari ura aarugamiirite maternity ntugu inu Nderitu Wamai augiite mwekuru uyu aathamirue Runyenje gugutuika nwa mwanka athinjirwe na theatre ya Embu neatumikaga na mwajie gungi.

Cibitari inu niugiite mwekuru uyu neeyagwa utungata bura kubatiiri indi nyomba ya mwana yaatembuka kimagosa na gutema bairi babu bakua.