Category Archives: muuga fm

Muthuganirua wa guuragani wikirwa mpiini Maua


Muthugaanirua ura akuirikana kumunta na kajiu na kuuraga muthaka umwe dereba wa bikibiki nteere cia Maua neekiritwe mpiini.

George Miriti Kalung’e ura aari na nkari muthemba wa probox ariirikana kumunta Ian Mwenda na riitwa riiyikene muno Omari wa mianka 25 kajiu ga kibara mwanka gukua utugu bwa guukira igoro.

Kulingana na ura aakuyiire ikarika riru, mututigi aumiite na bikibiki bwa Maua athiite Antubochiu rira nkobia yake yaumire na kugwa na ireo aarungikire bikibiki yake guchoka kumeoya.

Kuumania na untu bubu, muthugaanirua ura aari nyuma na nkari awatwa i muthuro na kwambiria gukumukangira mututigi ura athukiirie bikibiki yake na kuthi.

Nyuma muthaka uyu kuthi, Miriti ariirikana kumuuma nyuma na kumukerukira mita inkai ara aamuingiirie na guuka auma nkarini na kajiu amumunta ga kibara.

Antu ba wendi bwega ibooyire muthaka uyu na kumuugithia cibitari ya kimission ya Maua indi agikinya naari gukua ara riboti yaaringirwe gituoni kia borisi ba Maua.

Muthugaanirua areekirwe mpiini ntugu ya igoro ari nyomba wake nteere cia Mutuati na naingiritwe gituoni kia borisi kia Maua agieteera gukinyithua kotini.

Nkari ira aari neo nithukiitue na maafisa ba DCI ibaguchwaa kajiu kara gaatumire kurutha unyamu bubu.




Muthugaanirua wa ugwatani kiainya wikirwa mpiini Kipipiri, Nyandarua


Ntomurume wa ukuru bwa mianka 30 kuuma ntuura ya Mumui, Kipipiri kaunty ya Nyandarua neekiritwe mpiini akiringithanua na kuinyangia kiwendo mwekuru wa mianka 60 na ura ari na utaukiru bwa mathugania.

Kulingana na akari, muthugaanirua weegitue ari na kamenyeria gaku indi akumenyekana aatoroka mujii na aguchokeera igoro eetanirwa na ireo areekirwe mpiini.

Nkuruki, akari baugiite nwigiitue kinya akigeria kuwata antu arume na kinya kuiya.

Naingiritwe gituoni kia borisi kia Miharati wa rira uchunkuni bukuruthwa mbere akinyithua kotini.




Asiasa Isiolo kuurua bamenyeere miario ya kwathurana akari


Atongoria ba gisiasa kaunty ya isiolo ibauriitue gutiga kuruta miario ira yumba kuingiira uthu gati ka migongo kaunty inu kwona kuri na thiiri ya kugana.

Mwaigi kigiina wa kanju ya kinthiguru ya akuru na ura i mukariri giti wa ngwataniro ya dini Isiolo Ahmed Seti augiite kagiita gaka ga siasa kuri miario atongoria baumba kuruta ikaathurana akari.

Kagiitani gaku nauriitie mbeu mbithi batigeetigiirie gutumirwa buthuku naasiasa.

Nkuruki, Seti nauriitie akari bara bari na bunduki kinyume na watho kaunty inu kuthikiiria na kwathikira mbitwa ya thirikari guchinenkanira bari bongwa bantu a weteera wa rira musako ukaaruthwa.




Bathatu guikirwa mpiini bakiringithanua na wamba bwa kigerio gia KCSE


Borisi town ya Busia ibaingirite aritwa bairi ba form 4 cukuru ya Brother Nicholas ira nea muntu kiumbe na muritwa wa university ya Kenyatta bakiringithanua na wamba bwa kigerio gia KCSE kira kithiite mbere.

Kulingana na afisa munene wa DCI nteere inu Benard Wamalwa, aritwa babu ba form 4 bareekirwe mpiini bari na thimu cukuru iri na biuria bia karatati ga tuthatu ga gichunku na bia karatati ga twiri ga Chemistry.

Wamalwa augiite nyuma ya guikirwa mpiini ireo kuramenyekanire thimu inu iraari ya muritwa wa mwanka wa 4 university ya Kenyatta na kaingo kwegwa biuria bibu na machokio kira muritwa ararutiite Kshs 1,500.

Rutere rwake, muritwa uyu wa university neerite maafisa ba uchunkuni arapeetwe biuria bibu i nwarimo munene wa cukuru imwe ya pry ya muntu kiumbe town ya Busia.

Mwarimo uyu nathiite mbere guchuiwa wa rira bathatu babu bakuirigiirwa gukinyithua kotini.




Mama Sarah Obama gukua


Rais Uhuru Kenyatta natumiite ntumiiri ya kuumiria kiri antu ba mujii wa Obama, achore na atuuri kuumania na gikuo gia Sarah Onyango Obama, uyuue wa ura aari rais wa America Barack Obama.

Kiri ntumiiri yake, rais Uhuru naweteete mututigi ta mwekuru areendete guteethia muno ntuura yake ya Nyang’oma Kogelo kaunty ya Siaya, na kuirutira wake kiri kuthi mbere kwa nthiguru ya Kenya gutaatura kuririkanwa.

Kulingana na antu ba mujii, Sarah arakuire ari cibitari imwe nteere cia Kisumu ari na ukuru bwa mianka 99 nyuma ya mbayua ya kagiita kaaraya.

Ikaaririkanwa Mama Sarah natheteere anene Barrack kagiita ka ithurano nthiguru ya America rira eerikanaga aticiariritwe nthiguru inu.

Riboti nkuruki kuuma kiri antu ba mujii iriuga mibango ya mathiko neambiritie.




Kigerio gia KCSE kuthungira ntugu ya ciiri


Kigerio gia kinthiguru gia KCSE kia mwanka muthiru na kira gikurutha kagiita gaka ikithungirite ntugu ya ciiri imunthi.

Minista wa kithomo aaga nthiguru prof George Magoha ari kaunty ya Murang’a ara arugamiirite kurugurwa wa container ya igerio town ya Kenol mbere ya kuriungira cukuru mwanya kaunty inu.

Akiaria kagiita ga kurekerua kwa igerio kiri macukuru, Magoha naugiite gutiri nkari cia antu biumbe ibatiiri gutumika gukamata kigerio giku.

Nkuruki, narutiite mukana kiri bara baguteetheria kiri wamba bwa kigerio giku akiuga mwarimo munene wa cukuru imwe nteere cia Western ura arabanganitie ataaramu ba kuruthira aritwa kigerio akathukirua itagaria.

Kagiitani gaku, CS Magoha naugiite mierekera ya rua ya rais Uhuru Kenyatta ya kurigiiria gutamba nkuruki wa corona aaga nthiguru na ira ikuringithi rwong’i rwa kithomo ibatiiri kuthingatiirwa kiri cukuru cia kinthiguru na ira cia kimanthiguru.

Minista mutetheria wa kithomo Sarah Ruto ari kaunty ya Kakamega kurugamiira kurugurwa wa container nteere cia Mumias mbere ya kuriunga cukuru mwanya kwona bura kigerio giku kithiite mbere.

Kagiitani gaku, murugamiiri munene wa TSC Nancy Macharia ari aaga kaunty ya Nairobi nteere cia Kamukunji wa rira nwee ura wa kanju ya igerio ya KNEC Mercy Karogo ari town ya Thika kaunty ya Kiambu.

Ntugu ya imunthi, aritwa babu bakaarutha igerio bia mathomo ma mathabu karatati ka mbere na Chemistry karatati ka mbere.




Kugaanua wa ishigo mbunge gukurukiira BBI gukuuyiria maoni nkurani


MCA wa Kangeta Romano Mwito nawete mbaru miario ya mubunge wa Igembe Central Kubai Kiringo iguru ria kugaanua kwa gishigo giku weegua riboti ya BBI igaakuruka.

Kulingana na Romano, gishigo giku kibatiiri kuganua kulingna na wendekithia na maoni mara maarutirwe i mwingi iguru ria kugiitanua wa sub-kaunty nteere inu.

Akiaria na Muuga FM rukiiri rwa imunthi, Romano augiite ta atongoria ibawatanirite mutaratara uyu uthingatwe ara wadi cia Njia, Kangeta na Akirang’ondu ukeegua iri Igembe Central nacio cia Athiru Rujine na Igembe East wigue iri Igembe East.

Ruteere rwake, mukari na musiasa wa gishigo giku Dr james Mithika naugiite muuga bwa ukeegua ari nkiama ya ithurano na mianka IEBC na kuumania na maoni mara makaarutwa naakari kagiita gakinya.

Amwe noogu, naugiite kugaanua kwa gishigo giku ikubatiiri kuthingatiira untuire bwa akari.

Kiri gishigo gia South Imenti, MCA wa Igoji East John Kireria naugiite wingi bwa antu kiri kira ward ibu bubatiiri kuthingatiirwa kagiita ga kugaania gishigo giku.




Mukana kiri aciari bara bakunenkera aana banini bikibiki


Rwong’i rwa ukaria, atongoria ba dini na bara ba ikundi bia bodaboda kaunty ya Isiolo ibauriitie aciari gutiga kwaa aana banini bikibiki kinyume na watho

Ino i nyuma ya muritwa wa form 2 kuuma nteere cia Mwangaza kaunty inu ya Isiolo gukua kuumania na mutino athithitie bikibiki ntugu ithatu nthiru.

Kamishna wa kaunty inu Herman Shambi naugiite muciari ura akawatikana anenkerete mwana umunini bikibiki kagiita gaka cukuru iri mbinge akathukirua matagaaria ma kiwatho.




Nchancho ya corona kutheteerwa Meru na Tharaka Nithi


Mutaratara wa kweyana nchancho ya corona kaunty ya Tharaka Nithi ukaathi mbere gutigiira kuri na gumbani bwa ndwaa ya murimo uyu.

Ikulingana na minista wa ugima bwa mwiri kaunty inu Dr Gichuiya Nthuraku ura augiite maafisa ba ugima bwa mwiri, ba ukaria, arimo na atongoria ba dini i gati ka antu ba mbere kwegwa nchancho inu.

Akiaria na Muuga FM kiri mubango wa Ntungo ya Nyomi rukiiri rwa imunthi, Dr Nthuraku natheteerete nchancho inu akiuga itiri na thiina nwa iriku kiri miiri ya antu.

Nkuruki, minista uyu nauritie kinya bara bakwegwa nchancho inu kuthi mbere kuthingatiira mawatho ma guikaria kuumania na corona.

Miario ta inu nirutiitwe i minista wa ugima bwa mwiri kaunty ya Meru Misheck Mutuma akiuria mwingi gutiga gukuthuka nchancho inu.

Mutuma ura kinya wee akwaragia kiri mubango wa Ntungo ya Nyoni naugiite gavana wa kaunty inu Kiraitu Murungi narikiitie kubua murimo wa Covid-19 kinya weegua nwa athiite mbere gukara mujii kulingana na mwerekera wa rwong’i rwa ugima bwa mwiri.




Guikabira murimo wa Covid-19


Wa rira murimo wa Covid-19 uthiite mbere kurura na gutamba aaga nthiguru, mwingi nuuritue kuthukiria na urito na kuthingatiira mitaratara ya thirikari kuirigiiria kuumania na nchoma inu.

Akiaria na meetha ya ntheto, MCA wa Marimanti Susan Ngugi Mwindu augiite mururumo wa ithatu wa corona nwonekaniite gutema ntame anene na i kiri kira muntu kuimenyeera wengwa.

Mbitwa ya MCA wa Marimanti Susan Ngugi kuuria mwingi kuimenyeera kuumania na corona yiiyite wa rira uchunkuni bwonaniitie kiri antu 100, 13 bari na corona kaunty ya Tharaka Nithi.

Amwe noogu, baingi ba bara booroteetwe kwegwa nchancho ya corona kaunty inu iboonekaniite kuregana neo wa rira thirikari ya kaunty iruguriitie mutaratara uyu nteere cia Marimanti Tharaka.

Nabo maafisa ba ukaria ba Meru South kaunty inu ya Tharaka Nithi ibeerutiite kurwaa na gutamba wa corona na njira ya kwona mwingi nukuthingatiira mawatho mara meekiritwe i thirikari, iri ntheto kulingana na munini wa kamishna nteere inu Tobiko Nayoma.

Kungi naku…

Eekuru bakuru kuuma kaunty nini ya Igembe North kaunty ya Meru na bara naakiama ba MAUMAU ibaruthiite kigongoana gia untuire gia kuingatia murimo wa Covid-19 aaga nthiguru.

Nkuruki, ibaromberete gavana wa kaunty inu Kiraitu Murungi ura eebathuriite nyuma ya kuirikana ari na nchoma ya corona.