Category Archives: muuga fm

Arimi South Imenti kutheteera mawatho ma majani


Bamwe ba arimi ba majani kuuma Kionyo na Murungurune gishigo gia South Imenti kaunty ya Meru ibameneeretie kuthungirua siasa kiri urimi bwa kimera giku bakiuga ibakuwata mbaru mawatho ma thirikari bunka aki boona baita ya urimi bwago.

Barutiite miario inu wa rira minista wa urimi aaga nthiguru Peter Munya akuirigiirwa kuriungira arimi ba majani gishigo giku ntugu ya ruu kutheria nkuruki iguru rea mawatho maimbia ma urimi, wendia na uguri bwa kimera giku.

Mubunge wa South Imenti Kathuri Murungi nathiriitie nkanja cia waagi bwa ukaria kiri mucemanio uyu wa ntugu ya ruu akiuga nwa thirikari na ukeegua uri na ukaria bwa kugana.

Akiaria na Muuga FM, Kathuri nauriitie akari kugwata mbaru mawatho mara maguikirwa i thirikari kurugamiira urimi bwa majani akiuga imaguteethia arimi na makaleta ugaruruku bunene nthiguru yonthe.




Mt Kenya Mountain Running Championships Meru kuruthwa mwanka tuthiite


Mukondo wa yiiri wa ndwiro cia Mt Kenya Mountain Running nteere cia Meru ukaruthwa tariki 20 mweri wa yiiri mwanka tuthiite wa 2021.

Ikulingana na nkiama ira irugamiirite ndwiro aaga nthiguru teo Athletics Kenya kiri gikaro kia mwanya na abangania ba mashindano mamu nteere cia Nkubu ntugu ya igoro.

I wa rira ministry ya micetho gukurukiira minista Amina Mohammed irutiite mwerekera wa guchokeera kwa mitaratara ya miceetho, mashindano ma ndwiro na mara ma nkari magitigiirua kuthi mbere.




Kurikia ngwataniro ya Tharaka Nithi na rais Uhuru Kenyatta


Bamwe ba atongoria kuuma kaunty ya Tharaka Nithi ibajiititie kuiruta kurikia ngwataniro gati ga kaunty inu na rais Uhuru Kenyatta.

Batongoreetue i VC wa University ya Chuka Prof Erastus Njoka na Prf Lawrence Mbae, ibameneeretie atongoria bara bathuure ikwaga waaka ngwataniro inu bura kubatiiri.

Ibaugite kaunty inu niganiritwe i ngugi na miradi ya thirikari ya rais Uhuru bakiuga batikuwata mbaru murengo wa Tangatanga ura wonekaniite kuthi kinyume na rais.




Aciari kugea nkanja na kuibanga kwa thirikari kurugura cukuru


Thirikari nene gukurukiira rwong’i rwa kithomo niuriitue guikira mitaratara ya kugana mbere ya guchokwa wa cukuru.

Baingi ba aciari kaunty ya Meru bari na nkanja na mitaratara ira yiikiritwe mwanka kagiita gaka ya gukaria aritwa wa rira cukuru ciumba guchokwa mweri tuthiite.

Kagiitani gaku, bangi ibaugiite ukeegua buri untu buumu guchokia aana cukuru mwanka uyu kuumania na waagi bwa biici.




Umwe gukua kuumania na mutino wa barabara Chogoria


Ntomurume umwe nakuite nyuma ya kuringwa i bikibiki nteere cia Kamaara wadi ya Chogoria kaunty ya Tharaka Nithi ugoro bwa igoro.

Kulingana na akari, ntomurume uyu ura aumiite ntuura ya Ankamia sublocation ya Thiathi, Tigania East kaunty ya Meru araringirwe i bikibiki agikerania barabara na kunogoka akiragurirwa cibitari nene ya Chuka.

Kamada wa borisi kaunty nini ya Maara Mohammed Jaso nauriitie antu bara bakumenya mututigi ura araari bundi wa iratu na meaburi beebumirie na kuringa riboti.




CJ Maraga kurugura miako ya koti, Isiolo


Mugambithania munene na rais wa koti ya supreme David Maraga nakuirigiirwa kurugura mwako ura wakiitwe i banki ya manthiguru wa koti ya Isiolo mujii munene wa Isiolo ntugu ya imunthi.

Murugamiiri wa ukinyaniria rwong’i rwa ukuria bwa koti Nicholas Simani augiite kurugurwa kwa miako inu gukaa kanya kuletwa kwa agambithania ba koti nene na kurugurwa wa koti cingi mwanya kaingo guteethia akari.

Nuntu bura bukeneeretwe anene naakari ba kaunty inu ya Isiolo.




Tharaka Nithi kwongeerwa kigiina kia nthi buru


Kwambiria mwanka tuthiite wa kithirikari wa 2021/2022, kaunty ikambiria kugairwa mbeca na mutaratara waimbia ura urakurukiirue imbunge ya senate ntugu ya igoro na ura ukuirigiirwa gutumika kwa mianka 5 tuthiite.

Kulingana na mutaratara uyu, kaunty cionthe ikoongeerwa kigiina kira wigiitue ikiwata agu kabere.

Kaunty ya Nairobi neo ikagunika anene na kwongeerwa kimanja gia Kshs 3.3b, Nakuru yoongerwe Kshs 3b, Kiambu Kshs 2.2b, Turkana Kshs 2.1b na Kakamega 1.9b iri ya itano.

Kaunty ya Tharaka Nithi neo ikoongerwa mbeca ira nini buru gati ga kaunty 47, ikeongeerwa Kshs 289.6m na kugwata Kshs 4.2b…Nyambira ikoongerwa Kshs 324m, Vihiga Shs 400m na Isiolo yoongerwe Sh 469m na kugwata 4.7b.

Mbunge inu ya Senate nirakurukiirie kigiina gia Kshs 316b kira kibatiiri kugairwa kaunty mwanka uyu wa 2020/2021 kigaigwe kulingana na mutaratara ura wigiitue ugitumika.

Kiri gikaro giku kia igoro, abunge ba mbunge inu iboonanitie kuganirwa kwago bakiuga mirugamo yaago imirito nitemeete kaunty cionthe iwata mpongeeri.




Mwari kuinyangua kiwendo mwanka gukua Tharaka


Maafisa ba borisi ibaambiritie uchunkuni iguru ria ikarika rimwe ara mwari wa ukuru bwa gatigati akuirikana kugwatwa kiainya na kuinyangua kiwendo nantu kathumba thokoni ya Mukothima mwanka kuuragangirwa chuba sehemu cia siri ara nyumani akiirikana gukuira cibitari nene ya Marimanti.

Niikarika rira reaumiite utugu bwa Nchumathatu kiumia giki akubi ubisini bwa chibu wa Gikingo Jacob Mpuria indi gia kurigaria mwanka ntugu ya igoro atiraiyi untu ta bubu.

Akari ibameneeretie kwongereka wa nchobi location yonthe ya Gikingo meethoni ma chibu Mpuria na atathukie itagaaria nwa ririku, untu bubu bukiirikana gukarika utugu gati mwari uyu na bangi bakinyunyaga nchobi thokoni ya mukothima kinyume na watho bwa thirikari.




Aciari Isiolo gukeneera weyani bwa desk macukuru


Aciari kaunty ya isiolo ibakaathite muradi wa thirikari wa kwaa cukuru cia pry na secondary desk.

Amwe noogu, iboonaniitie uguaya bwago bwa mbeca cia mwingi gutumika bura gutabatiiri gukurukiira muradi uyu.

Gukurukiira mukariri giti waago Ismael Garma, ibauriitie kadarasi inu yeeyanwe aki kiri mabudi banini ba juakali ta bura thirikari yuugite.




Mbunge ya senate kumeneerua


Mukariri giti wa kanju ya magavana Wycliffe Oparanya augiite itagaaria ria kurungika mitaratara kiri kaunty ti rea muntu kiumbe indi riumaniitie na gavana bonthe 47.

Oparanya nameneeretie maseneta ikwerekeria muthuuro na maruru kiri wee na untu bubu bwakurukiirue kiri gikaro gia kanju yonthe ya magavana mwambirio wa mweri uyu wa 9.

Naugiite nkuuyanio mbungeni ya senate ira ireteete gucherithirua wa ugai kigiina kia thirikari cia matuura nitemeete kwagea guumu bwa uruti ngugi kiri kaunty ara kinya aruti ngugi baingi batawete mishaara ya mieri kathumba.

Gavana uyu wa Kakamega augiite ibagereetie bura kumbikana kuuria senate ikurukie mutaratara wa kugaira kaunty mbeca na i taka mbunge inu iremeetwe i ngugi yeeyo.

Kagiitani gaku, akari kaunty ya Isiolo ibammeneeretie mbunge inu ya senate ikuremwa gukurukia mutaratara wa kugaira kaunty mbeca mwanka igakinya bantu a kurungika mitaratara yaacio.

Bamwe barienda mutaratara wa agu kabere utumika kugaira kaunty mbeca inu wa rira bangi bakwenda mbunge ya senate iteeyanirua buru gukurukiira BBI.

Miario ta inu ya kumeneeria senate nirutiitwe i bamwe ba akari kaunty ya Kirinyaga bakitheteera itagaaria ria kanju ya magavana na kuuga gutiri mabiria mukariri giti wa kanju inu Wycliffe Oparanya aruthite.

Baugiite wa bura mbunge inu ikurukagia nampwi mantu meegie abunge, nibatiiri kugwatanira na gukurukia kugaiwa kwa mbeca inu kaingo mwingi wa Kenya utiga kuthi mbere kurea kinyamaara.