Category Archives: muuga fm

Mwari muritwa wa form 3 kuuma ntura ya Bula wadi ya Bulapesa kaunty ya Isiolo neekiritwe mpiini akiirikana kuruta nda ya mieri kathumba na guta kiuno nteere cia Pepo La Tumaini akubi na guntu guku.

Kulingana na kamada wa borisi kaunty nini ya Isiolo George Kariuki, maafisa ba ukaria ibathiite mbere guchwana na dagitari kuuma Meru ura akuirikana guteetheria mwari uyu kuruta nda.

Nauriitie aciari kumenyeera aana bago na kinya rira bagia nda batige kubariria buthuku nontu untu bubu nwa buteme bathukia matagaaria ta mamu.

Antu arume bairi ibeekiritwe mpiini nteere cia Kangeta Igembe ya gatigati nontu bwa gukara na aana ba aari ba cukuru na nkuruki kubaira nda.

I ntheto ira ikuuyiritwe i chibu wa nteere inu Morris Kimathi ura augiite kinya aari babu na muciari umwe ibeekiritwe mpiini.

Kimathi nauriitie aciari kumenyeera aana bago ba aari na gutaara bara bakugea nda batige guchiruta.

Aana 513 na aari aritwa kuuma Rongai kaunti ya Nakuru nibakujiri gwikirwa mau ja kurio kuuma January mwanka mweri jwa 5 mwaka juju.

DCC wa Rongai Ronald Mwiwawi nakuuga mungana juu ni kuuma kiri ndiunga cia clinic iria ikugitwa ni aana bau ituone mwanya bia ugima bwa mwiri ndeo.

Mwiwawi nongerete kuuga mau jau ja kurio ti ja kumana na antu arume banene aki, indi ni kinya kuuma kiri aana bangi nthuki imbanake, akiuga aciari nibonekanite kugwaa buru kiri mirerere imiega.

Kuringana na Mwiwawi, utumiri bwa dawa cia mbogita na nchobi umwe na utumiri into bia wagi nthoni mitandaone niburingirite anene makarika ja mau ja kurio gatagati ka aana ba cukuru.

Makarika ja murimo jwa Covid19 kajakwongereka o ndene ya mathaa 24 o ntuku, untu buria bukubatara o muntu kiumbe kwimenyera o bweega gutina ruugo.

Ndene ya mathaa 24 mathiru, makarika jangi meeru 309 nijakujiri kuuma kiri ithimi 4, 228, na gwankia 7,886 mungana jwaajo aja nthigurune.

Dr. Rashid Aman ni mwandiki munene murungamiri wa ministry ya ugima bwa mwiri.

Naugite ithimi biu bieru bigiti kiri kaunti 37 aja nthigurune, gicunci kia 86.4 kiabio biumite kiri kaunti 10 kiri iu 37, tacio Nairobi, Mombasa, Narok, Busia, Nandi, Nakuru, Kajiado, Kisumu, Turkana na Makueni,

Kaunti iu ingi 27 igutigara irina gicunci kia 13.6 kia ithimi biu.

Makarika jau meeru 309 ni kuuma kauntine mwanya, Nairobi igitongeria najo 193, nayo ya Nyandarua igitwikwa ya ruaa buru gukujira ikarika ria corona ikiandikithia rimwe ndene ya mathaa 24 mathiru, na gwankia 43 mung’ana jwa kaunti iria irina murimo jwa Covid19.

Dr Aman nongerete kuuga ajie bangi 51 nibaamburi kuuma cibitari mwanya aja nthigurune na gwankia 2,287 mung’ana jwa baria borete kumana na corona aja nthigurune.

Ruterene rungi kunari uu mwajie umwe nakwite kumana nayo, na gwankia ikuu 160.

Jonthe kenda, bwa ikumi Aman nakuuga ni o muntu kuthingatira na kuingia mitaratara iria iiki, iri njira yonka ya gwikaria kumana na murimo jwa Covid19, na kumiregeria ni guciikira ugwatine nkuruki gwa ntuku ciijite,

Kiama kia arimu ba cukuru cia secondary gwitia KUPPET nigikwenda thirikar iraithe nkuruki ukaria bwa aana kagita gaka bari nja bakiithuranira gucooka cukuru.

Mukariri giti wa kiama kiu Omboko Milemba nakuuga uria kuri nandi, guti muntu kinya uu uumba kumenya ntuku cukuru ikarugurwa, na kwou bwa bata nandi ni gutigira aana bari tariria.

Nagwetete kwongereka kwa makarika ja nyamario kiri aana gutwika thiina nene, na kwenda minista wa kithomo George Magoha gwitia gikaro na akuria ba kithomo kuraitha njira cia kurwaa na thiina iji.

Arimu bonthe bakathimwa murimo jwa Covid19 mbere ya cukuru kurugurwa.

Ni nteto kuringana na minista wa kithomo Prof. George Magoha.

Akiaria gituone kia mathomo ja thirikari kaunti ya Embu kagita ka mucemanio na akuria mwanya ba gikithomo, Magoha nakuuga itua riu ni rimwe ria wiru bwa kurwaa na virus iu.

Ni indiria mwandiki munene murungamiri wa ugima bwa mwiri Dr.Rashid Aman augite ti untu buuthu kuthima arimu bonthe gwa kagita karia bubu bubangiri, akiongera ati ngerekana nigucuwa.

Arimu bakendekana gucooka cukuru ciao biumia biiri mbere ya tariki ciacio kurugurwa, aritwa baria bakwirigirwa kugita igerio bia kinthiguru bia muthia jwa mwaka bakiewa kaanya ka mbere.

Baingi ba akenya nibaguciuria kethira rais Uhuru Kenyatta akeberia mitaratara iria iiki kurwaa na virus ya corona, indiria akwirigirwa kwariria nthiguru ruuju.

Ataalamu ba kiuchumi nibagutitika mitaratara Iu yeberue kana kunyiua, ba ugima bwa mwiri bakirita ntumiri kuregana na bubu.

Samuel Nyandemo  mutaalamu wa kiuchumi, nakuuga kethira mitaratara iu ikeberua, kwomba akenya batigunike anene kumana na nthiguru nyingi kurigiria safari cia ndege cia kimanthiguru.

Nongerete kuuga kwomba thiina cia kumana na mitaratara iu ikamata kinya nkuruki kiri akenya nkuruki ya murimo jungwa.

Prof Lukoye Atwoli nakuuga kweberua kwa mitaratara iu ni thiina nene kiri akenya mono kumana na ati rwangi rwa ugima bwa mwiri aja nthigurune rutina inya ya kurwaa na mungana munene jwa ajie.

Nakuuga nyingi cia cibitari niciambiritie kuremerwa ni mungana munene jwa ajie, na thirikari cia kaunti no itiraithuranira bwa kungana kurwaa na mungana munene jwaabo.

Jau jakarikite indiria gicunci kia 89 gia akari ba miena ya ibanda aja mucii munene bakwenda akenya bete mbere kurigirua kuuma kauti imwe gwita kiri ingi.

Kuringana na utwiria bwa TIFA, gicunci kia 79 gia akari bau nibakwenda kabiu iite na mbere.

Borisi ba Tigania West kaunty ya Meru iboonoketie kagenke ka biumia biiri kara karateetwe mundani wa mpempe nteere cia Mutionjuri.

Kaana gaku kara ng’ina atakuri kumenyekana karoonirwe naakari bara bararingire riboti kiri borisi, untu bubu bukimeneerua anene.

Aana baithi 35 ibeekiritwe mpiini nyuma ya kuithirwa nyomba imwe ya gukombora town ya Homa-Bay bakinyunyaga nchobi, bhang na gutuma ndugu ya kiwendo.

Maafisa ba borisi amwe na atongoria ba matuura baraithukira nyomba inu mutaani wa Sango ugoro bwa igoro nyuma ya kugwata riboti kuuma kiri mwingi, ara aana bangi bathanthatu bakuirikana gutoroka.

Aana babu bara i ba gati ka mianka 13-17 na aritwa ba cukuru cia pry na sec bareethirwe batogonete na batari na nguo ara nkuruki kurari na mibira ya kubanga uciari imitumire.

35 babu, aari 15 na antuarume 20 ibaingiritwe gituoni kia borisi ki Homa-Bay amwe na mwene nyomba inu bagieteera gukinyithua kotini ntugu ya Nchumathatu.

Kamada wa borisi kaunty nini ya Homa-Bay Sammy Koskey augiite aciari ba aana babu ibauriitue gukinya gituoni giku kia borisi ntugu ya Nchumathatu rira ukeegua bairiitwe kotini.

Chibu munene wa location ya Arujo Bob Lang’o nauriitie aciari kumenyeera aana kagiita gaka bari mijii.

Minista wa urimi aaga nthiguru Peter Munya nameneeretie murengo wa gisiasa wa TangaTanga ura ukugwata mbaru munini wa rais William Ruto nontu bwa kuithungiria kiri siasa cia 2022 bantu a kurutira akenya wira.

Amwe na kwigua atiweteete munini wa rais na riitwa, Munya augiite gutiri gitumi gia kuringa siasa cia giti kinene na uri ubisini.

Akiaria nteere cia Ahiti Ndomba, Kutus kaunty ya Kirinyaga, Munya naugiite ugaruruku bwa katiba i bwa gitumi na naaki ya akenya nontu neo njira aki ya kwona bakurutirwa wira.

Naugiite katiba ya mwanka wa 2010 neari ikaaruthirwa ugaruruku nyuma ya gutumika uu mianka 10, miario ira iwetwe mbaru i mubunge wa Ndaragwa Jeremiah Kioni