Category Archives: muuga fm

Kagenke gutegwa mundani wa mpempe Tigania


Borisi ba Tigania West kaunty ya Meru iboonoketie kagenke ka biumia biiri kara karateetwe mundani wa mpempe nteere cia Mutionjuri.

Kaana gaku kara ng’ina atakuri kumenyekana karoonirwe naakari bara bararingire riboti kiri borisi, untu bubu bukimeneerua anene.




Aana 35 guikirwa mpini bagituma ndugu cia kiwendo nyomba imwe


Aana baithi 35 ibeekiritwe mpiini nyuma ya kuithirwa nyomba imwe ya gukombora town ya Homa-Bay bakinyunyaga nchobi, bhang na gutuma ndugu ya kiwendo.

Maafisa ba borisi amwe na atongoria ba matuura baraithukira nyomba inu mutaani wa Sango ugoro bwa igoro nyuma ya kugwata riboti kuuma kiri mwingi, ara aana bangi bathanthatu bakuirikana gutoroka.

Aana babu bara i ba gati ka mianka 13-17 na aritwa ba cukuru cia pry na sec bareethirwe batogonete na batari na nguo ara nkuruki kurari na mibira ya kubanga uciari imitumire.

35 babu, aari 15 na antuarume 20 ibaingiritwe gituoni kia borisi ki Homa-Bay amwe na mwene nyomba inu bagieteera gukinyithua kotini ntugu ya Nchumathatu.

Kamada wa borisi kaunty nini ya Homa-Bay Sammy Koskey augiite aciari ba aana babu ibauriitue gukinya gituoni giku kia borisi ntugu ya Nchumathatu rira ukeegua bairiitwe kotini.

Chibu munene wa location ya Arujo Bob Lang’o nauriitie aciari kumenyeera aana kagiita gaka bari mijii.




CS Munya kumeneria DP Ruto


Minista wa urimi aaga nthiguru Peter Munya nameneeretie murengo wa gisiasa wa TangaTanga ura ukugwata mbaru munini wa rais William Ruto nontu bwa kuithungiria kiri siasa cia 2022 bantu a kurutira akenya wira.

Amwe na kwigua atiweteete munini wa rais na riitwa, Munya augiite gutiri gitumi gia kuringa siasa cia giti kinene na uri ubisini.

Akiaria nteere cia Ahiti Ndomba, Kutus kaunty ya Kirinyaga, Munya naugiite ugaruruku bwa katiba i bwa gitumi na naaki ya akenya nontu neo njira aki ya kwona bakurutirwa wira.

Naugiite katiba ya mwanka wa 2010 neari ikaaruthirwa ugaruruku nyuma ya gutumika uu mianka 10, miario ira iwetwe mbaru i mubunge wa Ndaragwa Jeremiah Kioni




Weyani bwa ibande guchokeera Isiolo


Kinyamaara kia waagi bwa ibande gati ka mbeu mbithi kaunty ya Isiolo igikuirigiirwa gukinya muthia.

Ino i nyuma ya kamiti yaimbia ya guchunkuna bara bakuuyuria fomu cia kuthukia ibande kaunty inu kuruthwa.

Kamishna wa kaunty inu Harman Shambi augiite kamiti cia agu kabere icagiire nkanja ya kwaraganua, untu bura buratemeete mutaratara wa weyani ibande urugama kwa igita.




Kuithuranira wa kaunty gukandana na corona


Thirikari cia kaunty nithiite mbere kuingana na igiita kwona igukinyaniria wendekithia bwa itanda 300 bia aajie ba corona mbere ya tariki 7 mweri uyu.

Kiri mucemanio ura waruthiitwe gaaruni ya rais ya Nairobi gati ka rais Uhuru Kenyatta na magavana, ibaawatanire gukinya kagiita gaku wigue kira kaunty iri na itanda bitakunyiira 300.

Amwe noogu, kaunty imwe ciaumba kuremwa kuuyuria untu bubu ara gukinya kagiita gaka i kaunty 15 aki iri na itanda bira bikwendekana.

15 inu naamwe na Nairobi ira itongoreetie na itanda 628, Mombasa 450, Machakos 430, Bungoma 404 neo Kiambu iri na itanda 325.

Kaunty ya Meru iri na itanda 124 aki, Embu 145 neo Isiolo iri na 127.

Kshs 5b icianenkaniirwe kiri kaunty kuuma kiri ministry ya ugima bwa mwiri guteetheria kiri kuibanga guku.

Kagiitani gaku, kaunti ya Marsabit iri na mubango wa kugura itanda 250 bia aajie ba corona kwongeera 50 bira iri nabio.

Afisa munene wa rwong’i rwa ugima bwa mwiri kaunty inu Fatuma Jilo augiite gukinya kagita gaka bari na itanda 50 bira biri cibirai nene ya Marsabit.

Jilo naugiite ministry inu niwete Kshs 28.8M ira ciakurukirue i mbunge ya Marsabit na icio igutumika kugura itanda bibu.

Nkuruki, natumiiritie kwora kwa aajie bairi ba murimo wa Covid-19 kaunty ya Marsabit bara indi bagaachokua mijii yaago indi bathi mbere guchubirwa naataramu ba ugima bwa mwiri.




Namba ya ayie ba murimo wa Covid-19 kwongereka Dr.Kalebi


Warii akenya million 2.6 bakuthuganirua mwankira indi ibarkitie na kuwatwa na corona

Rwangi rwa ucunkuni bwa kimirimo na ndawa KEMRI ruriuga county ya Nairobi neo itongoretie na ayie baba na gicunci kia 12.4% kura amwe na ugu baingi bao bataiji kana bari nau ithingatiritwe ii county inu

Kuringa na ndagitari Ahmed Kalebi wa nyomba ya uthimi bwa mirimo ya Lancet Kenya uwatithani bwa murimo uyu nwa bukathi na mbere

Kuringana na ndagitari Kalebi na ati wongereku bwa uwatithania bwa murimo uyu ibukuirigirwa mweri tuthiite kura nyingi chia county ikaigua iri na ayie baingi bamurimo uyu

Narombete akenya kuthingata mwerekera wa thirikari keenda kurigiria gutamba nkuruki kwa murimo uyu

Ariuga watho bwa kurigiria antu kumaruka oome mathaani ma utugu ibutethetie bunene kurigiria gutamba kwa murimo uyu




Antu bara bathimiritwe na kuwatikana na murimo wa covid-19 Kenya gukinya 7,188


Namba ya antu bara bathimiritwe na kuwatikana na murimo wa corona aaga Kenya indi inakinyite antu 7188 na inyuma ya antu bangi 247 kuthimirwa na kuwatikana na murimo uyu antuni aa mathaa 24 marikitie na kuthira

Kurigana na munini wa minister kiiri ministry inu ya ugima bwa miiri nwee Dr Rashid Amani,antu baba ii gati ga antu 4147 bara bathimiritwe murimo uyu antuni aa mathaa mama

Amani ariuga antu bangi 39 ibarekeretue kuuma chibitari nyuma ya kwora murimo uyu na gukinyia antu 2148 bara borete mwankira indi

Amwe na ugu antu bangi 2 ibarikitie na gukua antuni aa igita riri ara indi na antu 154 bakuite kuumana nau

Nyamira county neo county ya rua kwigua iri na mwayie wa murimo uyu

Igita ria ntuumiri ino,Amani ariuga ayie ba murimo wa cancer ibawotwa mono ii murimo uyu na auga ibarugurite ituo 10 aaga Kenya biakuragurira ayie ba murimo uyu.Ariuga kurugurwa wa ituo bibi gugatethia kunyithia ayie ba murimo uyu bara bathiyaga gucoa utungata nthguruni chia oome




Mbunge kuunga mauri mwendekithua wa mutari mathabu wa thirikari


Kamiti ya mbunge yeegie kigina nikuirigiirwa kuunga mauri ura rais Uhuru Kenyatta eendekithitie kuthukia kanya ka mutari mathabu munene wa thirikari.

Nancy Kabui Gathungu nwee woroteetwe i rais Uhuru kuthukia kanya ka Edward Ouko ura term yake yaathirire mweri wa 8 mwanka muthiru.

Spika wa mbunge nene Justin Muturi nakuuyirite kuwata wendekithia bubu ara abunge bari na ntugu 10 gukurukia kana kuregana na riitwa riru.

Gathungu aari wa mbere gati ka antu 3 bara baanenkanirwe kiri rais i nkiama ya wandikani nyuma ya term ya Ouko gukinga muthia.

Edward Ouko wigiitue ari mutari mathabu munene wa thirikari kwa mianka 8 akiuga naganiritwe i ngugi ira arutiite.




Aari bairi guikirwa mpini bairirite mubungwa bhang rumande, Kirinyaga


Borisi kaunty ya Kirinyaga ibekirite mpiini aari bairi bairirite mubungwa gituoni kia borisi gia Kianyaga muthogoto 17 ya bhang gisiri.

Aari babu bara i ba mianka 18 na 25 barakamatiite bhang inu na thermos kuirira mubungwa wa ukuru bwa mianka 22 ura eekirwe mpini ari na bhang kiya wee.

OCPD wa kaunty nini ya Gichugu Anthony Mbogo nakuuyirite ntheto inu.

Nyuma ya guikirwa mpiini, bairi babu baugiite mubungwa arabeerite numwajie ikwagia bhangi na abataara batumire thermos kumuirira yoo rumande.




Ntomurume, 55 kuinyangia kiwendo kaari ka mianka itano


Ntomurume wa mianka 55 ura niithe wa aana 3 naingiritwe gituoni kia borisi kia Mitamboni kaunty ya Machakos akiirikana kuwata kiainya na kuinyangia kiwendo kaari ka mianka 5.

Niikarika rira rikuirikana kuruthika ntuura ya Ngulikya location ya Mitamboni kaunty inu ya Machakos rira kaari gaku keenukite kari amwe na achore bako.

Kulingana na munini chibu wa sub-location ya Muthunya David nguzu, muthuganirua arawatire kaari gaku na kuingatia achore bake mbere ya kuthungira nako nyakini na gukaruthira unyamu bubu.

Kaari gaku ikathiite mbere kuragurirwa cibitari ya Mitamboni wa rira muthuganirua akuirigirwa kuthamirua gituoni kia borisi gia Kathiani mbere ya gukinyithua kotini.