Category Archives: muuga fm

Ruuji kugiitwa Nairobi


Kambuni ya unyagia ruuji aaga Nairobi NAWASCO nitumiiritie kugiitwa kwa ruuji nteere mwanya mwanya kwambiria imunthi mwanka ruu Nchumaa thaa kumi na ciiri cia rukiiri.

Mukariri giti wa kambuni inu Nahashon Muguna augiite untu bubu buumanitie na waaki bwa barabara ya Express Way ruteere rwa Uhuru highway, pipe ciaimbia na cia tene cia ruuji ikiirigirwa kuwatithanua nteere inu mwanka Museum Hill kwaa kanya waaki bwa barabara inu kuthi mbere.

Nteere ira ikaaga ruuji naamwe na gatigati ka mujii wa Nairobi, Mombasa road, South B, South C, University Way, JKIA, Industrial area, Jogoo road, City stadium, Maringo, Bahati amwe na Buruburu na ntuura cia akubi.

Amwe na kambuni inu kwigua ikiuga kuri na ruuji rwa kugana, akari aaga Nairobi wigiitue kwa igiita bakitheta iwaagi bwa ruuji.




Ithima bia ruuji gutuika ugwati kiri akari Tiagania, mubunge Mutunga kumeneerua ikwaaga kurikia kwa muradi uyu


Mubunge wa Tigania West Dr. Kanywithia Mutunga nameneeretue ikuurithiria matu iguru ria kuthirikiria na kuirigira ithima bia ruuji bira utongoria bwake bwenjire mindani ya akari na bira indi bikuirikana gutuika ugwati kiri utuuro bwa antu na nyamu cia ndiithia.

Akiaria nyuma ya ntomurume wa nkeruki ya mianka 60 kugwa na gukuira kirinyani giku nteere cia Matiru wadi ya Athwana, Gakii Mbui ura i musiasa kuuma gishigo giku augiite kwa mianka 3 wigiitue bakiinyiria mubunge uyu kuthirikiria ithima bibu indi gutiri itagaaria athukiitie.

Nauriitie Mutunga kuthirikiria muradi uyu kurega ugu marinya mamu mathikwe nontu matiri na baiti kiri akari, na-hasara aki makuira.

Kagiitani gaku, Gakii nauriitie akari nteere ira iri na marinya mamu kuimenyeera na kumenyeera muno aana banini, akiuria bara bakuumba kubiiriga bongwa.

Miario yake niwetwe mbaru i bamwe ba akari nteere inu.




Atongoria kuurua batherie weegua Maili Tatu iri Meru kana Isiolo


Akari ba Maili Tatu, Meru nteere ira ciankeene na Isiolo Kambi ya Juu ibameneretie kugeranirwa naatongoria ba nteere inu, untu bura bakuuga ibutemeete baaga miradi ya gitumi ta ruuji, stima na barabara.

Ibauriitie atongoria ba Meru kubeera weegua bari kaunty inu kana bari ira ya Isiolo nontu ikinyamaara kitheri bakurea ikwogua bari mwankani.




Ibandi gutiga gutumika 2022, kadi cia Huduma Namba gutumika, thirikari kuuga


Ibandi bigatiga gutumika mwaka twitite jwa 2022, na kadi cia Huduma Namba kwambia gutumika.

Mwaria wa thirikari Colonel Retired. Cyrus Oguna nakuuga thirikari nikwirigirwa kwambia mukondo jwa iiri jwa waandikithia bwa antu bwa kadi cia Huduma Namba kwaa kaanya baria no bataciandikithia kugwata kadi iu njeru, juria jukagitirwa icigone bia sub county

Oo nakuuga thirikari nithondekete kadi gatagati ka milioni 5.3 na milioni 5.5 mwanka nandi, no ni kadi milioni ithatu aki ijukitue ni eene, buria akuuga ni kumana na akenya kwaga kwijukia kinya nyuma ya kwamukira ntumiri ati iri tayari.




Biuria guuka iguru ria kethira rais Uhuru akagwata mbaru umwe wa atongeria ba NASA kurwira urais mwaka twitite


Biuria bia kethira kurina umbikika bwa rais Uhuru Kenyatta kugwata mbaru umwe wa atongeria ba ngwataniro ya NASA kurwira urais mwaka jwijite nibiukite.

Kunari uu ataalamu ba mantu ja gisiasa barina uuge mwanya iguru ria kethira kurina umbikika bubu gukarika, Prof Peter Kagwanja akiuga rais atithirwa na bungi tiga ni kugwata mbaru umwe wa atongeria ba NASA, maoni jaria jakureganwa najo ni ataalamu bangi Elias Mutuma na Charles Munyui.

Nteto ya kethira NASA ikariukua ni umwe wao kurwira urais kinyayo niyukitie maoni mwanya, bau bathatu bakiuga kethira atongeria anene bayo bakagwatanira kairi, kwomba gukethirwa na bata ya kuthondeka ngwataniro ingi.

Nibakuuga ngwataniro iu kwomba ikareta amwe biama akiama ba NASA kwa nandi, na kinya bia KANU na Jubilee, kethira bakethirwa na kaanya ithuranone inene biijite.

Kiuria ni ati itua riu rikagarura atia siasa cia Kenya, Kagwanja akiuga kethira ngwataniro iu ikethirwa iri o, ni ikaremera munini wa rais William Ruto urwirine utongeria mwaka twitite, maoni jaria jaregani najo ni Mutuma uria ukuuga Ruto nonekanite kwibanga sawasawa gwanka nandi.




Kurina umbikika bwa kuingwa gwa kaunti ya Kisumu, CS Matiang’i kuuga


Minista wa mantu ja ndene Fred Matiang’i nandi nakuuga kurina umbikika bwa gwika mitaratara imirito, burio kuinga kaunti ya Kisumu na iria ciankene nayo kurwaa na gutamba gwa corona.

Akiaria mucemanione juretete amwe kamanda ba miena na kaunti kamishna gituone kia mathomo ja thirikari aja Nairobi, Matiang’i naugite ntumiri tariria ikaritwa nyuma ya kwaraniria na rais Uhuru Kenyatta iguru ria kuingwa gwa kaunti ya Kisumu.

Oo Matiang’i nakuuga kuuma rais aramuethia murungamiri wa aminista akui miaka 4 mithiru amwe na gutongeria kuingua kwa miradi ya thirikari, miradi iu nandi nikuingua kagita kario.




Korti nene kurigiria JSC gucunkuna kana kuthitanga jaji 6 baria batithuuri ni rais Uhuru Kenyatta


Korti nene nirigiritie kamiti ya JSC gucunkuna kana kuthitanga jaji 6 baria batithuuri ni rais Uhuru Kenyatta gwetera kuthikirwa kwa igamba.

Jaji James Makau oo narigiritie kamiti iu kuraitha iagmba o rionthe kana wendekithia bwa kweberia kana gutonyera na njira o yonthe ngugi cia jaji bau 6, kuringana na riboti iria itumi ni rais kiri JSC iguru riawe kwaga kubathuura.

Jaji Makau o kagitene kau naritite watho bwa kurigiria uritithia bwa riboti ni rais, kumana na igamba ria Bernard Odero Okello, uria ukuuga rais naathurite jaji bau 6, oo akiuga katiba nikurita kaanya ati rais athuure majaji kuringana na mawendekithia ja JSC.

Kiri igamba ringi, jaji Makau neberetie mariitwa ja jaji munene Martha Koome, munene wa watho Paul Kihara Kariuki na majaji 34 baria bathuuri ni rais Uhuru Kenyatta, kiri igamba riri kortini ria kuregana na kuthuurwa kwa majaji 34.

Jaji James Makau noritie ati file ciegie bubu kunenkanirwa kiri jaji munene kuthuura majaji ba kuthikira igamba riu.

Dr. Benjamin Gijenyi niwe wikitie igamba riu kortini akiregana na kuthuurwa kwa majaji bau 34 akiuga itua riu ni mugaru na watho na kwenda korti gutitika mwaandikithia munene wa magamba amwe na jaji munene kunywithia mumma majaji 6 na agambithania bairi baria rais Kenyatta aregete kuthuura indiria aathurire bau 34.

Nteto iu ikagwetwa tariki 28 cia mweri juju.




Thirikari kubanga kurita shilingi bilioni 39 kiri kaunti gwikinya jumaa iji


Thirikari nikubanga kurita shilingi bilioni 39 kiri thirikari cia kaunti gwikinya jumaa kiumia giki.

Ni nteto kuringana na minista wa kigina Ukur Yattani uria ukuuga nakuuga mbia iu ikethirwa ni cia mweri jwa ithatu na 4, indiria bakiirigira kwaa thirikari cia kaunti mbia cia mweri jwa itano mbere ya mwaka jwa kigina kuthira.

Kunari uu nerecete akiama ba kamiti ya mbia mbungene ya senate ati itua riu ni kumana na mantu kuuma kiuchumi kwa nandi, indi nibakwirigira kugwata mbia iu kwaa kaunti mugao jwacio.

Oo nakuuga nibakwirigira gutigara na musajo jwa mweri jumwe aki kiri thirikai cia kaunti, mbia iria akuuga bakarita orio thirikari yagwata cia kungana.

Ni miario yukitie mateta na maseneta kuuga ni hatari niuntu kwomba gukathingatiria gukuama kwa ngugi thirikarine cia kaunti, akiama ba kamiti iu itongeretue ni Charles Kibiru bakienda watho kuthondekwa buria bugatigaira thirikari cia kaunti nikugwata mugao itikumakania kuuma gwa uchumi kuria kugukujirwa.

Maseneta Mutula Kilonzo Jnr na Moses Wetangula nibakuuga thirikari ya kinthiguru nitite mbere kurita ngugi ja withire no cia kaunti nikuinyirika.

Magavana kunari uu nibakuuga mbia iu iria ikuritwa ni thirikari itikungania mobatu ja thirikari cia kaunti, wa Machakos Alfred Mutua na wa Kirinyaga Ann Waiguru bakiuga mbia iu ni ja ntata kiri thirikari cia kaunti na kuuga bubu kwomba bukaangaratania mutaratara junthe jwa wathani bwa matura.




Muthuganirua wa wamba kwonoka gikuu ciarera Iriani, Tharaka, njarene cia akari


Muthuganirua wa wamba nonokete gikuu ciarera akugwatikana akiia mburi na nguku miena ya Iriani, Tharaka, na kuurwa mpurwa ya katheti na nyanje.

Bolici nibakinyirikite gutonyera bubu kwonokia muthuganirua uju ntomurume wa ukuru bwa miaka 24, akari bau na muthuro bakienda kumuithiria nyuma ya kumwaa mpurwa iu.

Nyuma ya kugwatwa nandi narigiritue gituone kia bolici kia Mukothima, ucunkuni bwitite na mbere na nakwirigirwa gwikua kortini o narua.




Aritwa ba KCPE ya 2020 gwita form one tariki 2 cia mweri jwa 8 mwaka juju.


Tariki 2 cia mweri jwa 8 mwaka juju nicio cia aritwa ba form one gwita cukuru iria beeti.

Minista wa kithomo Prof George Magoha naugite aritwa 36,252 nibagwete twanya cukurune cia National.

Aritwa baria bagwete martks 400 gwitia nibaegi kaanya cukurune cia National na cia Extra County iria bathuurite.

Aritwa ba mobatu ja mwanya kinyabo nibaegi kaanya gwita cukurune iria bathuurite.

Ngugi ya mwaka juju ya uthuuri aritwa gwita form 1 nigiti rungu rwa njira ya kidigital kiri iwango bionthe kuuma cia National gwanka cia Subcounty.

Aciari na amenyeri ba aana nibakurua gutuma Index namba ya muritwa kiri 22263 kumenya cukuru iria mwana eeti.