Category Archives: muuga fm

Mwekuru kuuraga kaana gake Tigania


Mwekuru umwe kuuma Mworonkanga wadi ya Akithi, Tigania West kaunty ya Meru naringiite na kuuraga kana gake ga kaiyi ga ukuru bwa mianka itano.

Niikarika rira rikuuyiritwe i munini wa chibu nteere inu Samuel Igwete, atuuri bakimeneeria mwekuru uyu na kuuuga wigiitue ari na ntiga na mukuru wake amwe na atuuri kwa igiita riraya.




Thirikari kuurua yoongere arimo


Thirikari niuritue kurekeeria mbeca kureo na cia kugana kiri macukuru kurutha miako na mibango yingi ira ibatiiri kunyithia mutindikano wa aritwa kagiita gaka kuri na nchoma ya corona.

Kulingana na mubunge wa Igembe South John Paul Mwirigi, cukuru mbingi nigukuuyira mutindikano wa aritwa ara indi arimo bakulazimika gutuma aana mijii kugiira biici ya kurugamiira miradi mwanya.

Nkuruki, John Paul nauriitie TSC kwongeera arimo na kubatuma cukuru ira iri na aritwa baingi indi itari na arimo ba kugana.




Aritwa cukuru ya nthaka ya Bukembe, Bungoma kugoma


Gisangasa ikirakuuyirwe cukuru ya sec ya Bukembe kaunty ya Bungoma utugu bwa guukira imunthi nyuma ya aritwa kworia stima na guukia ntiga ara barenyangirie into bia mung’ana utakumenyekana.

Kulingana na atuuri ba cukuru inu, baroonire meonki yoora mbere ya kwigua gituma kia aritwa na kuuragangwa wa into kathumba mbere ya borisi gukinya.

Mwanka kagiita ga kuthi ruugoni, gitumi kia mugomo uyu wa aritwa.

Ikarika riru ria utugu bwa guukira imunthi riumirite wa rira minista wa kithomo Prof. George Magoha ameneeretie aciari ikunaania na kurekeeria aana bago.

Magoha augiite thirikari itiitigiiria waagi nthoni na migomo kuthi mbere gukuuyirwa macukuru.




BBI kuringirwa debe Isiolo


Siasa cia BBI icionekaniite kwambiria kuwata mwanki na kuirwa matuurani, senator wa Baringo Gideon Moi agikinya kaunty ya Isiolo kumiringira debe na kuuga ikaleta thiiri gati ka migongo kaunty inu.

Amwe noogu, bamwe ba atongoria kaunty inu batongoreetue i gavana Mohammed Kuti ura akuwata BBI mbaru bari na mantu beenda maruthirwa ugaruruku kiri riboti inu.

Gati ka mantu mara Kuti akwenda maruthirwa ugaruruku kiri riboti ya kagiita gaka i mutaratara wa kugaira kaunty mbeca na kwona kira kaunty ikwongeerwa ishigo mbunge.




Nyomba cia kumama cia aritwa kubea cukuru ciiri, kaunty cia Meru na Embu


Kwa igiita ria mairi kuuma cukuru irarugurwa mwanka uyu, nyomba ya kumama ya cukuru ya sec ya Mukuiru wadi ya Karama, Tigania East kaunty ya Meru nibiite na gutiga aritwa bagitara hasara inene.

Aciari na aturi bara bareebumirie kworia mwanku uyu wa utugu bwa guukira imunthi ibarombeete uchunkuni kuruthwa kumenya kaumo kaau wa rira bauriitie thirikari ya kaunty kwaiga nkari ya kworia mwanki nteere inu.

Kungi naku….

Into bia aritwa bia mung’ana utakumenyekana ibibiite nyuma ya nyomba imwe ya kumama cukuru ya nthaka ya Kirimari kaunty ya Embu kuwata mwanki utugu bwa guukira imunthi.

Mwanki uyu ura kaumo kaau gatakuri kumenyekana uratumukire aritwa bari iracini na kubiithia nyomba ira iramaamaga aritwa 40.

Munini wa OCPD wa Embu West George Gitau naugiite maafisa ba kworia mwanki ba kaunty ibarakinyire na guteetheria kworia mwanki uyu na uchunkuni ibuthiite mbere kumenya kaumo kaau.

Amwe noogu, mwarimo munene wa cukuru inu Lawrwence Mutembei naugiite aritwa babu 40 bakaigwa kiri nyomba cingi cia kumaama ira irakitwe rua na mathomo makaathi mbere ta withire.




Nyamu cia ndiithia Isiolo kwegwa nchancho ya Rift Valley Fever


Thirikari ya kaunty ya Isiolo gukurukiira rwong’i rwa urimi neambiritie kweyana nchancho kiri nyamu cia ndithia nteere cia Merti na Garbatulla kurwaa na murimo wa Rift Valley Fever ura guuragiite antu batakunyiira 6 gati ga 18 bara baawatikaniite nau.

Minista wa urimi kaunty inu Lawrence Mwongela Ikiamba nauriitie akari guikaria kuumania na rwagi rura rugutambia murimo uyu kuuma kiri nyamu kuthi kiri antu na nkuruki kumenyeera kurea nyama itari nduthire ithimi bura kubatiiri.




Ngige gukinya Tharaka


Murumbi wa ngige kuuma paka ya Meru nuguiriirite nteere cia Ntoroni, Mpondoni, Irereni, Kiruaki na Gatithini utugu bwa guukira imunthi, akari bakigea uguaya kuumania na imera biago bira biri mindani.

Ibarombeete thirikari nene na ira ya kaunty gukurukiira rwong’i rwa urimi kuthukia itagaaria ria mpwii kurwaana na ngige inu mbere ciira hasara inene.




Siasa cia ubunge Matungu kuwata mwanki


Siasa cia ubunge kiri ithurano binini gishigo kia Matungu nithiite mbere kuwata mwanki, biama na aruiri giti giku bakiibanga kuthukia kanya ka mututigi Justus Murunga.

Eugene Murunga, mwana wa ura araari mubunge nteere inu Justus Murunga na araari gukurukua i IEBC kuruira giti giku neeberete na kuuga akawata mbaru Alex Lanya wa kiama kia UDA.

Gungi ura athukiitie itagaaria ta riru i Paul Posho, untu bubu bukeonekana kuringa jeki siasa cia kiama giku na kira gikuringithanua na munini wa rais William Ruto.

Atongoria mwanya ba siasa cia UDA Matungu areogo mubunge wa Mumias East Benjamin Washiali na ura aara senator wa Kakamega Boni Khalwale ibameneeretie biama bia ODM na ANC bira kinya bio birungikiite antu.




Eendia miguongo gutuirwa kibungo kia mianka itano i koti ya Marimanti Tharaka


Antu arume bairi ibatuiriitwe kibungo kia mianka 5 kana baine ya Kshs 1m kira umwe i koti ya Marimanti nyuma ya kuwatikana na miguongo ya njogu ya urito bwa kilo 28.5 na mung’ana wa Sh 2.85 million.

Josphat Muthengi na Stephen Mwithi Muthengi, bonthe kuuma wadi ya Nkondi Tharaka beekirwe mpiini bari na miguongo inu tariki 6/11/2018 i maafisa ba borisi bawatanirite na bara ba KWS.

Bairi babu bara baari kuregana na nthitango inu na kurekeerua na bond wigiitue bagiitiga igamba kuuma mujii na ria muthia kuwatikana na mabitia mbere ya mugambithania S.M Nyaga.

Nkuruki, koti inu niiritwe ti ria mbere biashara ya muthemba uyu gukuuyirwa nteere inu, ikiruta mukana kiri agwimi.

OCPD wa Tharaka South Kiprop Ruto nauriitie mwingi kumenyeera nyamu cia kithaka akiuga biashara inu i kinyume na watho.




Ntomurume kumutanga mwekuru na kajiu mbere ya kuiburaga, Embakasi East


Borisi aaga Nairobi ibaguchunkuna ikarika rimwe ara ntomurume wa ukuru bwa gatigati akuirikana kumutanga mwekuru wake na kajiu mbere ya kuiburaga utugu bwa guukira imunthi nteere cia Tassia, Embakasi East.

Bairi babu bara barathamirite nteere inu ntugu inkai nthiru bariirikana kuthetania mbere ya ntomurume gutemanga mwekuru wake.

Kulingana na atuuri, bareegirue mbu na ireo barakinyire nyomba inu na kubarumurana mbere ya kuugithia mwekuru cibitari ya Mama Lucy aaga Nairobi.

Kamada wa borisi ba Nairobi Rashid Yakubu nakuuyirite ikarika riru akiuga kajiu kara karaari na damu ikareethirwe nyomba inu i maafisa ba ukaria bara barakinyire nteere inu.

Mwiri wa muthaka uyu nuthukiitue na kuirwa mortuary ya Citi wa rira uchunkuni nkuruki buthiite mbere, Yakub akiuga gutiri karatati ntomurume arandika mbere ya kuiburaga na mwekuru kagiita gaka attiumba kwaria kuuga kira kiraari na thiina.