Category Archives: inooro fm

A-kenya guthingatwo mehuge makiria na homa ya Corona


A-kenya ni moritio matige kugonderera mbaara-ini ya murimu wa Covid 19 uria ururumukite ringi na njira nene.

Ndumiriri ino iheanitwo ni ataaramu ruhonge-ini rwa ugima wa mwiri hamwe na atongoria makiuga bururi uri ugwati-ini.

Hari kiumia kimwe githiru andu makiria ma ngiri ithatu ni manyitikanite na murimu ucio uria ningi uroraga andu na gikiro gia kuguoyohia.

Na namba ya aruaru umuthi yerekeire gukinya ngiri mirongo ina na ithano, guku thirikari igicurania gucokia mikana iria iiriga kuregerio.




Njaamba cia bururi guthingata thirikari imaririkane tukiroka gukunguira Mashujaa ruciiu


Njaamba nyingi cia wiyathi ni ihinyiririe thirikari imaririkane kumana na itemi riao ria gukura bururi ukombo-ini wa mbari ya nyakeru.

Joyce Wangui wa Wainaina kuuma itura ria Huruma mwena wa Eldoret ni umwe wa njaamba cia Mau Mau na atuuragia wonje kumana na mbaara iria ahurirwo.

Wangui riu ari na miaka igana rimwe, na erite Inooro Ruciini ati otiga mbeca cia andu akuru ndari uteithio ungi anaheo ni thirikari.

Mwandiki witu Salome Murugi ni aagiite giikaro na cucu ucio na agatuhariria riboti ino.




A-kenya guthingatwo mekirire miriire miega niguo guithema na mirimu iria itagwatanagio


Oriri Kenya iranyitanira na mabururi mangi thiini wa thi, gukunguira muthi wa irio, ugwati uria urehagwo ni miriire miuru ni utuikite nditi nene hari gutheremia mirimu iria itagwatanagio.

Mirimu ya cukari, cancer, kuhaica thakame gatagati-ini ka ingi miingi ikuruhanagio na miriire itari mikinyaniru.

Gukiri uguo muingi uuritio gucokerera irio cia kinduire ohamwe kurumirira utaaro wa ataaramu a miriire miega niguo guithema na mirimu ta iyo iria ingigiririka.

Kaunti ya Nyeri nio ikoragwo na namba nene ya aruaru aria magumiirwo ni mirimu iria itagwatanagio.




Murutwo wa form 4 kuiyuraga mwena wa Kirinyaga thutha wa kugucia bangi


Kimwana kimwe kiria kirathomaga kirathi gia form fourni kirutite muoyo na njira ya kwiita itura-ini ria Kianjogu mwena wa Kirinyaga.

Nyina wa mwanake ucio augite muuriu araambite kugucia bangi na guthii na mundu mariganitie kuria aregerire ngero iyo.

Gikuu giake kirahanikira muthenya mbere ya acokete thukuru mwena wa Meru niguo atirihe githomo giake gia secondary.

Ni ndeto icungiriire kieha kuri muingi wa itura, makimenereria maabithaa a ruhonge rwa wathani ni guitikiria wendia wa bangi mwena ucio.




IEBC kuhetukia ahuraniri 7 a giturwa kia MCA wa wondi ya Lakeview, Naivasha


Kamiti ya ithurano na mihaka bururi-ini IEBC ni ihetukitie ahuraniri mugwanja kuhitahitanira giturwa kia MCA wa wodi ya Lakeview mwena wa Naivasha.

Ahuraniri acio ni hamwe na MCA wa tene Simon Wanyoike Wanango uria urathamire kiama kia Jubilee thutha wa kwaga kuiganira na kura ya wamurani.

Githurano kinini wondi-ini iyo kiraaririo tariki ikumi na ithano Dithemba yukite niguo kuihuria ithenya riria riatigirwo kurumirira gikuu gia Peter Karanja Mburu.




Muingi gutetia ngarama ya iguru ria urimi oriri thi yothe irakunguira muthi wa irio


Umuthi ni muthenya wa irio thiini wa thi.

Ukunguiri wa mwaka uyu ni wa mirongo mugwanja na gatano kuuma muthenya uyu waamurwo ni ruhonge rwa irio thiini wa thi FAO.

Na ma-million ma andu makoretwo hatika-ini ya ng’aragu, kumana na mathina ngurani maria mehiriirio ni gututhuka kwa homa ya Corona.

Guku bururi-ini ruhonge rwa urimi makiria wa mbembe ni rugumiirwo ni mathina ta kuhaica kwa ngarama ya urimi na guthuka kwa riera.

Kungi nakuo arimi mwena wa Uasin Gishu ni moritie thirikari kuhuthia ngarama ya urimi niguo gutigirira kuri na irio cia kuigana cia kuhunia muingi.

Mubango wa gutigirira kuri na huni bururi-ini ni gitugi kimwe hari inya iria irongoreirio ni thirikari ya President Uhuru Kenyatta.




Andu 20 maratangikirwo mari hatika-ini thutha wa kugumirwo ni homa ya Corona mwena wa Nakuru


Thirikari ya kaunti ya Nakuru ni yaaniriire kuri na ugwati munene thutha wa murimu wa Covid 19 guthii na mbere gutherema makiria gicigo-ini kiu.

Nginyagia riu andu mirongo ina nio mooragitwo ni king’uki kiu mwena ucio, oriri angi mirongo iiri maratangikirwo mari hatika-ini.

Na ngavana Lee Kinyanjui augite thina ucio wihiriirie thutha wa muingi guteaniria mitaratara ya kuimenyerera.

Nake minister wa ugima wa mwiri thirikari-ini iyo Dr Gichuki Kariuki augite muingi warega gwathika riu ni megucokia mikana makiria.




Uhuru kugomithania ndundu ya Aminister mwena wa Manyani


President Uhuru Kenyatta umuthi niguo aragomithania ndundu ya A-minister mwena wa Manyani, kaunti ya Taita Taveta.

Giikaro kiu gitanyitwo kumurika hamwe na mangi ugitiri wa bururi na ningi mwerekera wa riboti ya kamiti ya uiguithanio BBI.

Riboti iyo iria yetereio kurekererio kuri muingi o kuuma mweri wa gatandatu na yendekithitie mogaruruku gatiba-ini kugerera kura ya mawoni mbere ya ithurano cia 2022.

Na munini wa President William Ruto akoretwo muhari-ini wa mbere kuregana na mogaruruku macio ta gucokio gwa giturwa gia Prime minister.

Hindi ya icera riu Uhuru ningi ni atanyitwo kugomana na utongoria wa ciikaro cieri cia mbunge muthenya wa ruciu.

Ningi Uhuru ni atanyitwo gucera runyanjara-ini rwa nyamu cia githaka rwa Tsavo.




Murutani umwe mwena wa Kinangop gutharikirwo ni muikurwo umwe wa wikinai na gutigwo hatika-ini


Mutumia umwe mwena wa Kinangop, Nyandarua arahonia nguraro njuru thibitari-ini ya Kwa Ng’othi thutha wa guthecangwo na kahiu ni muikuirwo utoikaine.

Emmah Wanjiru na uria ni murutani aragerirwo ngero iyo akiroka wira thutha wa guthecangwo tuhiu tutandatu na gutigwo hatika-ini.

Riu bamiri yake ni ihinyiririe honge cia ugitiri gutuirania na muikuirwo ucio niguo aherithio kuringana na watho.




Thirikari ya Thailand kwanirira watho wa wihuge kurumirira mirurungano ya muingi


Thirikari ya Thailand ni yaaniriire watho wa wihuge itemi-ini ria kuhotithia honge cia ugitiri kung’ethanira na mirurungano ya muingi.

Prime Minister wa bururi ucio Prayuth Chan-ocha, niwe uheanite mwerekera ucio ndumiriri yake igithomwo ni borithi kugerera nyumba ya mohoro ya thirikari.

Ni ndeto yukite oriri borithi marokire guikia ngono arurungani matanyihiire mirongo iiri muciini munene wa Bangkok.

Arurungani acio marahinyiriria Prime minister ucio atige wira na ningi muthamaki wa bururi ucio anyihirio maahinya ma wathani.