Category Archives: inooro fm

Ikuu cia murimu wa covid-19 guthii na mbere na kuongerereka bururi-ini


Namba ya andu aria mooragiitwo ni murimu wa Covid-19 guku bururi-ini noirathii na mbere na kuongerereka, kuria riu ikinyiite andu 325 thutha wa andu angi 14 guthinikanio ni murimu ucio ihinda-ini ria mathaa 24.

Munini wa minister wa ugima wa muiri Rashid Aman niwe wanirire uhoro ucio akiuga ona kuhana uguo namba ya andu aria marigitiitwo na makahona murimu ucio niyambatiriite nginyagia andu 8,121 thutha wa andu angi 100 kuhona.
Oho ni atariirie ati nginyagia riu bururi wa Kenya wandikithiitie aruaru 19,913 , thutha wa andu angi 788 kuonekana na murimu ucio ihinda-ini ria mathaa 24.




Mundurume gukundikwo kioho kia miaka 30 njera mwena wa Kirinyaga


Mundurume uria wiriga guitikira mahitia ma kuuraga mwendwa wake mbere ya igoti inene ria Kerugoya county-ini ya Kirinyaga riu ni akundikiitwo kioho kia miaka 30 njera.

Simon Murimi Wanjohi  atariirie igoti  ati niwe woragire muiritu maari ndugu Eunice Wambui Waicinga  utuku wa tariki  23 mweri-ini muthiru wa 6,, ituura-ini ria  Kiandieri.

Na thutha wa kuheo mweke wa gwitetera nioriirie igoti rimurekere akiuga  atindikiririo kugera ngero iyo ni maroho ma ngoma.

Wakiri wake Magara Kemunto augiite Wanjohi niatariirie igoti ati ni aingiriite githomo-ini kia ngoma hindi iria aikaraga mwena wa Mombasa,kuria aathiirwo oorage mwendwa wake niguo ahingie kiraniro kiria makinyaniirie.

Muiri wa Wambui wacokire guthikurio irima-ini riria athikiitwo muci-ini kwa mundurume ucio,,,tariki 27 mweri-ini wa gatandatu mwaka-ini uyu.




Igoti ria Milimani kuhingwo niundu wa corona virus


Ruhonge rwa ucirithania nirwathaniite igoti ria Milimani guku mucii wa Nairobi rihingwo kwa ihinda ria thiku 14 kwambiriria muthenya wa ruciu, thutha wa mundu umwe kuonekana na murimu wa Covid-19.

Mucirithania munene  David Maraga niwe uheaniite mwerekera ucio akiuga macira maria marabatara gutangikirwo na ihenya megutuithanio kugerera mitambo ya kiiriu.

Ihinda-ini riu ria thiku 14 aruti wira igoti-ini riu nimathiitwo meige keheri-ini niguo thutha ucio mathurimwo kana mari na murimu ucio.




“Huthirai mbeca iria muranyuaga njohi guteithia family cianyu”;Minister Kagwe


Andu aria makoretwo magicakaya niundu wa thirikari kuhingithia irabu na kuhotomia wendia wa njohi mikawa-ini nimoritio mooi uhoro ucio ta kirathimo miturire-ini yao kuona maya kugomania meririria ma guthirwo ni mungaro wa njohi.

Minister wa ugima wa muiri Mutahi Kagwe niwe wuikiitie ritana riu, akiuria andu aria mendete kuhinda njohi methe maundu ma bata maria mangika na mbeca iria marahuthagira kugura njohi na kuguriira arata,ta guteithia andu a nyumba ciao.

Kagwe augiite wee egukorwo muhari-ini wa mbere kuhuthira mbeca iria arekenagia nacio,,kuhingia mabataro ma family kana guteithiriria andu aria mari na bata makiria.




Andu angi 12 kuuragwo ni Covid-19 guku bururi-ini


Andu angi 12 nimakuiite kuumana na murimu wa Covid-19 ihinda-ini ria mathaa 24,, kuria murimu ucio riu ucungiriire ikuu cia andu 311guku bururi-ini.
Nao andu ango 113 nimahonete murimu ucio na riu ithabu ria andu aria marigitiitwo na makahona murimu ucio guku bururi-ini rirugamiire andu 8,021.
Minister wa ugima wa muiri Mutahi Kagwe niwe waniririe uhoro ucio,akiuga nayo namba ya andu aria magumiirwo ni murimu ucio niyongererekeete na gukinya andu 19,125 thutha wa andu angi 544 kuonekana na murimu ucio ihinda-ini ria mathaa 24.
Kagwe augiite heho iria ikoretwo kuu guku bururi-ini niikoretwo ikinyita itemi nene hari kuongerereka kwa namaba ya andu aria maragumirwo ni murimu ucio,,akiuria andu metheme igomano cia muingi niguomahonokie miyo yao.




Speaker Elachi kuhotomio gutabariira ciikaro cia mbunge


Speaker wa mbunge ya county ya Nairobi Beatrice Elachi niahotometio gutabariira ciikaro cia mbunge iyo nginyagia ndereti ya kumuhagura iria itemanitio ni mbunge-ini iyo  irike guciriirwo.

Ndereti iyo iratabariirwo ni Waithira wa Chege, uria urakuruhania  Elachi na mahitia matiganiite maria ni hamwe na wagarari wa gatiba na kwaga gukinyaniria ikiro.

Karani wa mbunge iyo Jacob Ngwele uria uracokirio wira thiku nini tu thutha wa karani ungi Edward Gichana kuihitithio, niwe urutire watho ucio, akiuga Elachi uria matakoretwo makionana ruheni ndari na ruutha rwa guikuruhania na mihango ya mbunge iyo nginyagia riria ndereti ya kumuhagura  igatuithanio.

Igoti inene nirio riteniirie kwamurwo gwa Gichana uria wihitithirio ni Elachi, undu uria uraheire Ngwele mweke wa gucoka wira-ini wake.




Akenya kurio metheme kuhuthira uuru wiyathi wa kunyuira njohi mici-ini


Minister wa ugima wa muiri Mutahi Kagwe nioriitie akenya metheme kuhuthira uuru wiyathi uria thirikari imahete wa kunyuira njohi mici-ini yao, thutha wa irabu kuhingithio na wendia wa njohi mikawa-ini kuhotomio na mworoto wa kugirirriia gutherema kwa murimu wa Covid-19.

Kagwe uria utaririe ati nduka cia kwendia njohi nduru itirahutio ni mawatho maria maraniriirwo muthenya wa ira  ni mutongoria wa bururi Uhuru Muigai Kenyatta, nioriitie ene nduka icio metheme kaimana guitikiria andu kunyuira njohi nduka-ini icio, kwaga uguo makanjirwo marua mao ma wonjoria.

Na watho ucio wa kuhotomia unyui wa njohi muingi-ini niuthiite na mbere na gutumura mawoni matiganiite county-ini ya Nakuru ta uria mwandiki witu Robert wa Maina aratariria.




Andu angi 14 gukua kumana na murimu wa Covid-19 guku bururi-ini


Andu angi 14 nimakuiite kuumana na murimu wa Covid-19, na kwambatiria ithabu ria andu aria mathinikanitio ni murimu ucio nginyagia andu 299.

Miniseter wa ugima wa muiri Mutahi Kagwe niwe waniririe uhoro ucio,akiuria akenya mathii nambere na kwimenyerera kuumana na murimu ucio ugwati.

Hamwe na uguo ni ataririe ati andu angi 75 nimahonete murimu ucio na gukinyithia 7,908 namba ya andu aria marigitiitwo na makahona murimu ucio guku bururi-ini.
Kagwe aheaniite uhorouyu oriri nayo namba ya andu aria magumiirwo ni murimu wa Covid-19 guku bururi-ini riu ikinyiite andu 18,581, thutha wa andu angi 606 kuonekana na murimu ucio ihinda-ini ria mathaa 24.
Andu acio ni gatagati ka andu 4,888 aria mathurimiitwo ihinda-ini riu, mwana wa ukuru wa mieri 4 ari umwe wa andu aria monekaniite na murimu ucio.




Nditimurano niirigiriirwo hindi ya guciriira mutaratata mweru wa ugai wa kigina


Nditimurano nene niirigiriirwo mbunge-ini ya senate muthenya wa ruciu gatagati ka maseneta a kiama kia Jubilee na aruna ao a kiama kia Odm, hindi ya giikaro gia guciriira mutaratara mweru wa ugai wa kigina kuri thirikari cia matuura.

Ma seneta a kiama kia Jubilee aria marareganaga na mutaratara ucio nimathitwo ma karooka kuuhitukia,,,kuria nao aruna ao a kiama kia Odm makinyiririe murugamo wao wa kunyita mbaru mutaratara uria wendekithitio ni kamiti ya kibururi igii ugai wa kigina CRA.

Na muthenya wa umuthi muhiuria wa mucharicha wa aria aingi Irungu Kangata niatabanirie giikaro na maseneta a kiama kia Jumbilee,,,muno makiria a mwahu wa Tangatanga aria marakoretwo mataumukaniitie,,na mworoto wa kubanga uria makahitukia mutaratara ucio na mugambo umwe.

Maseneta acio a Tangatanaga maugiite  kuhituka kwa mutaratara ucio gugakorwo kuri igutha inene kuri ngeithi cia thayu gatagati ka mutongoria wa bururi Uhuru Muigai Kenyatta na mutongoria wa Odm Raila Odinga thutha wa maseneta a kiama kia Odm kwiheta.

Wona mutaratara ucio wahitukio county 18 nicio cikurengwo kigina kiria cikoretwo ikiamukira kuria nacio county  29 iria kwa ihinda ria miaika 8 cikoretwo ikiamukira kigina kinini cikugunika.

Mutaratara ucio wendekithiitie mbeca cia muingi cigayagwo kuringana  na muigana wa andu ithenya-ini ria warie wa icigo cia wathani ta uria gukoretwo.




Andu angi 440 kuonekana na covid-19 guku bururi-ini


Namba ya andu aria magumiirwo ni murimu wa Covid-19 guku bururi-ini riu ikinyiite andu 17,975  thutha wa andu angi 440 kuonekana na murimu ucio ihinda-ini ria matha 24.

Ndumiriri-ini kuri nyumba cia mohoro ministry ya ugima wa muiri yugiite andu angi 5 nimathinikanitio ni murimu ucio na gukinyithia 285 namba ya andu aria mooragitwo ni murimu ucio guku bururi-ini.

Ihinda-ini riu nayo namba ya andu aria mahonete murimu ucio guku bururi-ini niyambatiriite na gukinya andu  7,833, thutha wa andu angi 90  kuhona murimu ucio.