Category Archives: inooro fm

South Africa kuregeria mikana ya kuhurana na homa ya Corona


Thirikari ya bururi wa Africa ya Muhuro ni iregeretie mikana miingi iria iragathikitwo niguo kuhita ugwatania wa homa ya Corona.

President Cyris Ramaphosa niwe uheaite mwerekera ucio agithana kuhingurwo kwa mathukuru, gucokereria kwa wendia wa njohi ohamwe na ciungano cia muingi.

Bururi wa Africa ya Muhuro niguo ugumiirwo makiria ni homa ya Corona gitaru-ini kiu thutha wa kwandikithia aruaru makiria ma million imwe turuma inya.

Hari acio andu ngiri mirongo ina na inya nio matoretio ni murimu ucio na magakua.




Njanjo ya Homa ya Corona itanyitwo gukinya bururi-ini mweri uyu


Njanjo cia kurigiriria murimu wa Covid 19 itanyitwo gukinya guku bururi-ini mweri uyu wa keri.

Uhoro uyu ni kuringana na mibango ya thirikari ikiuga uheani wa njanjo icio ciakinya iriheanagwo na njira ya kweyendera.

Maabithaa a urigitani, borithi na arutani nio matanyitwo kuheo mweke wa mbere, thirikari ikiuga iragura njanjo kuuma kuri kambuni ngurani.

Indi A-kenya ni mahinyiririe mubango ucio utigirirwo ni warumirira mawatho ma thuguri niguo guithema na ciiko cia ngukumio.




Kiunjuri kuhinyiriria nginya aregani mathikiririo ndeto-ini igii BBI


Mutongoria wa kiama gia TSP Mwangi wa Kiunjuri, ni ahinyiririe bata wa miena yothe kuheo mweke wa kuruta mucango wao wigii riboti BBI iria irikitie gukinyio mbunge-ini cia matuura.

Akiaria tabarira-ini ya Hagaria, Kiunjuri augite riboti iyo iri na mendekithia mega no indi kuri na maundu marabatara kurungwo.

Oho Kiunjuri ni atitirithitie bata wa atongoria othe kuuma Gikuyu-ini gucokania ndundu na maaragia na mugambo umwe niguo kunina nyamukano.




Minister Kagwe na mangavana a Mt Kenya gutetera riboti ya BBI


Mangavana kuuma Gikuyu-ini maugite icera ria President Uhuru Kenyatta ni ricenjetie muonere wa muingi wigii riboti ya BBI.

Ni ndumiriri iheanitwo ni mangavana Mwangi wa Iria na Ndereti Mureithi, makiuga ni meharirie kwendekithia riboti iyo matuura-ini.

Ona minister wa ugima wa mwiri Mutahi Kagwe augite riboti iyo iri na kiguni kuri muingi wa mwena ucio makiria hari ugai wa utonga wa bururi.




Mwanake umwe guikio ngono agikuirwo kuuraga ithe mwena wa Ruiru


Atongoria a makanitha ni mahinyiririirie ateti gutiganiria miario ya kumenithania muingi na mithingi ya kinduriri.

Ndumiriri-ini yao atungatiri acio maugite uteti wa mbukirira ni ugwati ungithararia thayu na urumwe wa bururi.

Riu ni moritie kamiti ya uiguithanio na urumwe NCIC itacukie makinya ma naihenya kuri ikundi iria iracogera na gutuuhuka miario ya muku na rumena.




Uthuthuria kugacirithio thutha wa thukuru wa imwana wa Karia, Kirinyaga gucinwo ringi


Indo cia ma-million ma mbeca ni ciangikire thutha wa mwaki munene kuhobaniria thukuru wa imwana wa Karia mwena wa Kirinyaga.

Mwaki ucio ututhukire utuku wa gukia umuthi na gucina nyumba imwe ya gukomwo ni arutwo.

Gutiri murutwo ugurarire, borithi magikuira mwaki ucio umundirio ni arutwo mari na muoroto utoikaine.

Munene wa borithi mwena wa Kirinyaga ya gatagati Daniel Ndege augite ni maratuirania na kihumo kia mwaki ucio.

No ciumia igiri thiru kuuma mwaki ungi waacina nyumba ingi ya gukomwo ni arutwo thukuru-ini ucio.

Mumbunge wa gicigo kiu Munene Wambugu augite no hindi araambiririirie gwaka nyumba iria yacinirwo, agikinyiriria ati riu aciari nio mekugukuithio ngarama ya hathara.




Borithi kuuraga muikuirwo wa uici mwena wa Mirangine


Borithi ni mahurite rithathi na kuuraga muikuirwo umwe wa uici mwena wa Mirangine, gicigo-ini kia Ol Kalou, Nyandarua.

Munini wa kamishna mwena ucio Joseph Ngeny augite ningi ni maikitie ngono muikuirwo umwe oriri ucio ungi aretharire na nguraro cia rithathi.

Ekuirwo acio marahobaniirio mathaa-ini ma utuku makuite ng’omnbe ya kuiywo na ngari nini.




President wa tene wa South Africa Jacob Zuma kurutirwo thamanji ni igoti ria gi-gatiba


President wa tene wa Africa ya Muhuro Jacob Zuma ni aathitwo gwathikira thamanji ya igoti ria guthikirira macira ma ungumania.

Mwerekara uyu uheanitwo ni igoti ria gi-gatiba rikiuga Zuma ndari na rutha rwa kurega gucokia ciuria hindi ya ciikaro cia guthikirira cira ucio.

Zuma akuruhanitie na ciiko cia uici wa mbeca cia muingi hindi iria aari thirikari-ini.

Indi ona kuri uguo mutongoria ucio wa tene ni akanite mahitia macio akiuga ni ndeto itari na muthingi.

Riu igoti ria ungumania bururi-ini ucio wa South Africa ni ritanyitwo kuheana giathi gia kwambiriria gwa cira ucio.




Thirikari kuga ni ikuhingura mathukuru mwena wa Kapedo


Thirikari ni yaaniriire ati mathukuru mothe ni mekuhingurwo mwena wa Kapedo muhaka-ini wa Baringo na Turkana, kwambiriria kiumia giukite.

Murugamiriri wa mihang’o ya thirikari gitaru-ini kia Rift Valley George Natembeya niwe uheanite uhoro uyu, thayu ni waambiririe gucokereria.

Aheanite ndumiriri ino oriri honge cia ugitiri irathii na mbere na birigiceni ya kuhita ekinai mwena ucio.

Ihinda-ini o riu Natembeya augite ni maikitie ngono ekuirwo mugwanja magikuruhanio na ciiko cia wagarari wa watho mwena ucio.




Uhuru kwambiriria mucemanio wa thiku igiri na atongoria a Gikuyu-ini


President Uhuru Kenyatta umuthi ni atanyitwo kugomana na Ma-MCA othe kuuma gitaru-ini gia gatagati wa bururi.

Giikaro kiu kirahanika thingira-ini munini wa iregi wa Sagana mwena wa Nyeri mbere ya mucemanio wa atongoria othe muthenya wa ruciu.

No mbere ya giikaro kiu mwaria wa thingira wa iregi Kanze Dena ni araroka guthathaura muoroto wa mucemanio ucio wa nduku igiri.

Nake Speaker wa mbunge ya Nyeri John Kagucia na murunawe wa Murang’a Nduati Kariuki maugite mekumurika mandu maria mamakonie mucemanio-ini ucio.

Uhoro uyu urahanika oriri riboti ya kamiti ya uiguithanio BBI irikitie gutemanio mbunge-ini cia matuura-ini iria igukorwo na itemi inene.

Nao atongoria othe thiini wa kaunti ya Kiambu maracemania umuthi mbere ya giikaro kiria giitanitwo ni President Uhuru Kenyatta mwena wa Sagana.

Aria maaritie na Inooro Ruciini maugite maracokania ndundu niguo makahota kurugamia mendekithia mao na murugamo umwe.

Giikaro ota kiu ni kirahanikire mwena wa Murang’a gigitongorio ni ngavana Mwangi wa Iria.