Bamiri iria ciakuiriirwo ni ciana thukuru-ini wa Precious Talent gukaira thirikari


Bamiri iria ciana ciao inyanya ciakuire thukuru-ini wa Precious Talent mwena wa Dagoretti ya Muhuro guku Nairobi ni ihinyiririe thirikari imarumbuyie niguo makinyire kihooto kiao.

Aciari a ciana icio merite Inooro Ruciini, ni meriirwo kigina gia ciringi million ithatu no itiigana kumakinyira.

Na amwe ao riu ni maagumirwo ni mirimu ya gutangika meciria, thutha wa mutino ucio wa mwaka muthiru uria wahanikire thutha wa irathi kumomokera arutwo.

Mwene thukuru ucio hamwe na ekuirwo angi ni maahinguriirwo thitango ya kuuraga matekurongoreria cira uria nginya riu uri igoti-ini.