Aria marengira county ya Embu mathimwe


Ita njira imwe ya kugeria kurua na murimu wa COVID-19, thirikari kiumia kithiru niyanirire watho wa andu gukinyaga miciiri yao tene mbere ya thaa imwe cia utuku na kumagara thaa ikumi na imwe cia kirauko.

Nwati kumana na uria a-Kenya engi makoretwe makiagara watho ucio vamwe na mitaratara ingi ya kurigiriria gutamba kwa murimu ucio, atongoria a ngathi ngurani makoretwe makiendekithia Rais Uhuru Kenyatta anirire watho wa andu kwivingira nyombari gwa kavinda ga ciumia igiri vururiri wonthe nwa amwe a atongoria makoretwe makiendekithia counties iria cie na aruaru a murimu ucio ivingwe aicio.

Riu, murungamiriri wa wadi ya Nthawa, Kariuki Mwari niwendekithitie ngavana wa county ya Embu kuvitukira ruvonge rwa ugima wa mwiri kwambiriria muvango wa kuthima andu onthe aria maratonya thiini wa county iyo itanjira ya kurigiriria murimu ucio.

Wavo augite ati kwina vata nayo thirikari nene igwatirire atongoria a nyumba kumi niguo marutage ndumiriri cia andu aria marecera icagiri maumite thiini wa county iria igumirirtwe ni murimu ucio.