Antu kathumba guikirwa mpiini ikuuna mawatho ma kurigiiria gutamba wa corona


Antu 45 bara bareekirwe mpiini bakinyua nchobi na guikenia bari na nkari ciago nteere cia Mwariki akubi na iria Nakuru kinyume na mawatho ma kurigiiria gutamba wa corona aaga nthiguru bagakinyithua kotini imunthi.

Kulingana na DCC wa Nakuru East Erick Wanyonyi, baingi ba bara bareekirwe mpiini nantu ba nkathi cia iguru thirikarini kana ba akubi nabo.

Amwe noogu, naugiite bonthe bakathukirua matagaria gutari kwendeera muntu nwa uriku.

Kagiitani gaku, antu bangi 69 ibareekirwe mpiini nteere cia Elementaita gishigo kia Gilgil kaunty inu ya Nakuru nyuma ya kuithirwa kiathoni bari nkeruki ya 100.

Ntheto inu nikuuyiritwe i kamada wa borisi ba Gilgil John Onditi akiuria mwingi kuimenyeera kuumania na murimo wa Covid-19.

Kaunty ya Nairobi, antu kathumba bara baraari na nkari barabarani mathaa ma kabiu ibaralazimikre gukara barabarani mathaa kathumba nyuma ya maafisa ba borisi kuinga barabara cia kuuma kana kuthungira Nairobi.

OCPD wa Kasarani Peter Mwanzo augiite kuingwa kwa barabara inu i kuthingatiira watho bwa kabiu bura bwikiritwe ta njira imwe ya kurwaana na gutamba nkuruki wa corona aaga nthiguru.

Naugiite mwingi nubatiiri kuthingatiira mawatho mamu, akiuga maafisa ba ukaria bakaathi mbere na misako guchwaana na bara bakuthi kinyume na watho.