Andu million mirongo iiri na kenda bururi-ini wa Tanzania guthurano muthenya wa ruciu


Ithurano nene bururi-ini turigainie wa Tanzania iraroka gutabanio muthenya wa Ruciu.

Bururi ucio uri na aikia a kura million mirongo iiri na kenda aria meyandikithitie kunyita itemi githurano-ini.

Ahuraniri ikumi na atano nio marahuranira giturwa gia president makihuthira tigiti wa ciama ngurani.

Indi hitahitano nene ni gatagati ga President John Joseph Pombe Magufuli wa kiama gia CCM na Tundu Lisu wa kiama gia Chadema.

Ceceni cia gukiria kura ikahingurwo thaa imwe cia ruciini na kuhingwo thaa ikumi cia hwaini.

Magufuli uria uri na ukuru wa miaka mirongo itandat aratetera giturwa kiu akienda gutongoria Tanzania itina ria keri na ria muthia ria miaka itano.

Mutongoria ucio ananagio ta Bulldozer niundu wa murugamo wake mbaara-ini ya ungumania.

Indi ona kuri uguo ni akoretwo akirutwo mahitia niundu wa kuhotomia wiyathi wa nyumba cia mohoro na uteti wa mung’ethaniro.

Nake Lisu ari na miaka mirongo itano na iiri na aracokire Tanzania mwaka uyu aumite Belgium kuria athiite riuriro thutha wa kuhonoka ngero ya kumuuraga.

Mutongoria ucio aahurirwo rithathi maita ikumi na matandatu kuri mwaka wa 2017 ni andu matoikaine.

Lisu ni arikitie kwanirira ati ari na nganja na mutabarire wa ithurano, akiuga ni agetia mirurungano angigekuirwo kuri na uici wa kura.

Ona muingi wa gicigo gia Zanzibar ni utanyitwo gukanyita itemi ithurano-ini cia ruciu.