Andu angi 176 nimakwatwa ni Corona vaa Kenya


Utalo wa andu ala maminite kuthimwa na makaikiithw’a kukwatwa ni uwau wa ikua ya corona kuma watangaaswa kuvika Kenya mwai wa katatu umunthi utalo usu niwaambata nginya andu 6,366.

Aineena na aandiki ma mauvoo, muandiki muungamii muviani wa uima wa mwii Dr. Rashid Aman niwasya kana, Utalo usu waambata itina wa andu angi 176 kuikiithw’a kukwatwa ni uwau usu umunthi itina wa andu 2,419 kuthimwa ungu wa masaa 24 mathelu.

Kaunti ya Ilovi na Mombasa nisyo syiendeeye kutongosya kwa andu ala meukwatwa ni uwau usu vala kati wa asu 176 ma umunthi , 99 maumite vaa Ilovi, Mombasa 20, Kiambu 17, Migori 13, Uasin 10, Kajiado 4, Busia 4, Kilifi 3, Makueni 2 na Masaku 1.

Okavindani kau awau 26 nimavutiwa umunthi itina wa kuvoa uwau usu vala ala maminite kuiitwa na makavoa yu ni 2,039.

Ona ou wiovo awau 4 nimatiwa ni thayu kumana na uwau usu wa corona vala yu utalo wa andu ala maminite kutiwa ni thayu kumana na uwau usu vaa Kenya ni 148.