Andu 2 guthikwo county-ini ya Kirinyaga thutha wa kuragwo ni coronavirus


Andu aingi nimakoretwo makioya na uhuthu maruru ma murimu wa Covid-19 guku bururi-ini, indi namba ya aruaru noguthii irathii na mbere na kuongereraka,,kuria onayo namba ya ikuu irathii na mbere na kwambatira.

Akenya aingi makoretwo makiuga gutiri mundu mooi ukuiite kuumana na murimu ucio matuura-ini mao,,no riu imakania cia mathiko ma aruaru a murimu ucio niciambiitie kuhura hodi matuura-ini.

Na muthenya wa umuthi andu 2 aria marakuire kuumana na murimu ucio nimathikirwo ward-ini ya Kiine mwena wa Ndia na ward-ini ya Kangai mwena wa Mwea county-ini ya Kirinyaga.

Eri acio aria ni a ukuru wa miaka 68 na 61,marakuiriire guku mucii wa Nairobi na mwena wa Ruiru county-ini ya Kiambu, na mathikirwo ni maabithaa a ruhonge rwa ugima wa muiri aria meguithaiite na matonyo ma kumagitira kuumana na  murimu ucio, na igongona ria kumahurukia ritabanirio kwa ihinda ria ndagika 15.

Ni ndeto imakirie aikari a matuura macio chibu wa Kangai Hezekiah Kathura,,agithaitha muingi witikire kurumiriira na kinyi mitaratara iria igathikiitwo ni thirikari na mworoto wa kuhotomia gutherema kwa murimu ucio.Nginyagia riu county ya Kirinyaga ndiri irandikithia muruaru ona umwe wa murimu ucio.