Akenya gwikiira aki uthambi njara kiri urui na virus ya Corona, TIFA kuuga


Utwiria bwa ruaa buria bugiti ni kambuni ya TIFA nibukwonania ati kiri mitaratara itano iria yendekithitue ni thirikari kurwaa na virus ya corona, akenya baingi barithingatira bumwe aki bwa uthambi njara.

Utwiria buu buria buriti narua kunari uu nibukwereca ati gicunci gia 18 gia akenya no batirambiria kuingia mitaratara o yonthe iria itangaci ni thirikari, watho bwa antu guciebania na ikundi buri o thiina.

Gicunci kia 77 na 70 gia akenya muthingatanio nibakugweta gukora na kirutira mwiri ja mantu jairi manene jakuringithanua na virus ya corona.

Kuringana na utwiria buu, mung’ana muniini jwa akenya gicunci kia 28 nibo bakumenya bionaniria bingi bia virus ya corona jontu kurumwa ni mutwe, kia 24 bakimenya kuremwa gwikia miruki bwega na gicunci gia 12 batiguturia noo atia bwegie bionaniria biu.

Utwiria buu nkuruki nibukwonania ati akenya baingi nibakumenya ati virus ya corona iritambua gukurukira gukora na gicunci kia 87.

Kunari uu gicunci kia 32 gia akenya batikumenya ati virus ya corona yomba gutambua gukurukira kuringithia antu kurinayo.

Utwiria buu nkuruki buriuga kurina nteto iti cia mma, gicunci kia 2 gia akenya bagitikia bionaniria bia virus ya corona ni kwigua mumero murimo, na gicunci kimwe bakigweta nchoma ja bionaniria biaju.

Akari mucii munene jwa Nairobi nibagweti ja bakumenya nkuruki iguru ria virus ya corona, aria gicunci kia 82 kiabo bakumenya bionaniria bia virus iu.

Utwiria buu bugiti kwambiria tariki 15 mwanka 21 cia mweri juju, aria antu ngiri imwe ba ukuru bwa miaka 18 gwitia batwiritue gukurukira waraniria bwa thimu iguru ria virus ya corona.

Mitaratara itano iria iiki ni thirikari kurwaa na virus iu ni amwe na kuthamba njara maita na maita ugitumagira ruuji na sabuni kana sanitiser, muntu akoora kana kwathimura agakunikira muromo agitumagira karatati ja tissue, ukaringithia nyiuru, metho kana muromo mbere na nyuma ya kuthamba njara, ciathure na antu nagwe gukara kana kurungama gataria ka mita imwe na ugatangamana na antu wajitue kana urina bionaniria virus iu.

Ministry ya ugima bwa mwiri nitangacite ati gwanka nandi, antu 25 barina virus ya Corona aja nthigurune.