Abunge kwenda riboti ya uchunkuni bwa magendo rwong’ini rwa KEMSA


Kamiti ya ugima bwa mwiri kiri mbunge ya Senate niuriitie mutari mathabu munene wa thirikari Nancy Gathungu kuruta riboti ya mbere yeegie uchunkuni iguru ria ngukumo kiri rwong’i rwa wendia dawa aaga nthiguru KEMSA mbere ya tariki 30 mweri uyu.

Mukariri giti wa kamiti inu Micheal Mbito augiite akenya ibeeterete muno kumenya bura mbeca ira ciathuriitwe guteetheria kurwana na gutamba wa corona ciatumikire.

Ino i nyuma ya kamiti inu kwenda Gathungu amurika aki KEMSA na ti matumiri monthe ma mbeca ira ciathuriitwe i thirikari.

Wendekithia bwa kamiti inu bwa riboti aki yeegie uguri bwa into rwong’ini rwa KEMSA buumaniitie na Gathungu kuuga arienda mwanka muthia wa mweri wa 11 kuruta riboti yonthe ya matumiri ma mbeca inu.

Iromba ria Gathungu kwegwa mwanka muthia wa mweri wa 11 irireganiitwe nareo anene imasenator bakiuga kagiita gaku ikaaraya na mma bwaumba kurega kumenyekana.

Gathungu neetiganiiritie na mwerekera uyu na kuuga akaageria bura kumbikana kwona akuuyuria untu bubu.